ORANJESTAD (AAN): Director di Instituto Medico San Nicolas (ImSan), Dr. Joel Rajnherc a laga sa cu tin un posibilidad di turismo medico na Aruba ora cu ta trata di pashentnan cu a haci un tratamento na un otro pais cu no ta asina intensivo y cu na Aruba por tuma e
pashentnan aki over.
E medico ta bisa cu pa esey ta bezig cu e 'calidad marker' cu ta Joint Commission International (JCI). Ora cu tin e 'JCI Accreditation' por ta sigur cu esey lo habri e portanan mas lihe y mas hancho, a remarca.
Dr. Rajnherc a duna di conoce cu aworaki ImSan no tin plannan di expansion pasobra esaki ta nifica inversionnan financiero basta grandi. "Ora nos yega asina leu cu esey ta bira un realidad cu nos ta wak cu e posibilidadnan echt tey. Nos ta bezig cu un business case. Ora esey ta proba, nos semper na ImSan ta hopi cauteloso di no bay bende e cuero prome cu bo a tira e bestia", a expresa.
A agrega cu ImSan tin basta manera pa expande den futuro. Un di e maneranan ta pa haci uzo di e parkeerplaats y busca un otro. Esey ta un solucion. Otro ta bay ariba, hisa e edificio. Esey no ta e miho escogencia pasobra hopi di e pida di tereno unda ImSan ta para ta clay y no sa con fuerte e fundeshi lo ta pa duna soporte na tur esey.
Pa ta mas cauteloso mester expande a lo largo di e tereno na lugar di bay halto. E investigacionnan ey a wordo haci caba ora cu tabata haciendo e renobacion y expansion di ImSan, a bisa.
