ORANJESTAD (AAN)- Uno di e preocupacionnan mas grandi na mundo ta, e forma cu e potencial pa un mucha recien naci, bira un criminal, ta crece.
“E posibilidad pa un mucha bira un criminal den cualkier ramo ta crece enormemente. Mas preocupante ta cu e cantidad di crimen pisa ta aumenta na paisnan grandi.”
Esaki ta
informacion cu a alcansa DIARIO y a bira motibo pa investigacion di un proceso alarmante cu a wordo presenta.
Tin diferente factor cu lo ta contribui na un mundo, cu ta crea e impresion di ta mas tolerante cu desviacion di leynan cu ta e barera democratico contra criminalidad.
Den un mundo di progreso rapido di factornan cu ta influencia comportacion humano, por nota falta di control di leynan pa vigila y controla kico ta e dieta moral cu ta alcansa publico entre cual cantidad di mucha.
Informantenan importante cu kende DIARIO a discuti desaroyonan di preocupacion riba tereno criminal internacional ta papia di cambio den basenan esencial di moral pero tambe un falta di leynan pa atende cu e impacto serio di falta di control den loke ta alcansa mucha na un edad tempran.
Ta wordo papia di un grado halto di cambio di e bida familiar den cual un mucha ta nace y crece y ta afecta e mucha seriamente. Kiebra di hogarnan, kiebra familiar, ta haci cu hopi mucha ta nace den un pakete di norma cu ta stroba desaroyo di un mentalidad sano.
Violencia den seno familiar tin impacto emocional grandi riba e mucha, cu mas y mas ta sinti falta di e normanan y ambiente di loke realmente ta familia y emocionnan positivo cu mester bira su base pa atende despues cu e ser humano.
“For di momento cu un mucha habri su wowo pa prome bez, e ta en busca di e mundo cu ta rondone y mester alimenta su bida sentimental,”ta bini dilanti.
Mas y mas e mucha y e hoben ta wordo expone na un mundo caminda e ganashi financiero ta mas poderoso y importante cu valornan y normanan cu tabata pilar di loke pa comunidad ta castigabel of ehemplar.
For di basta tempo riba tereno mundial ta vigila e aumento di criminalidad, cu tin su raiz na e etapa mas tempran di hende, ora e concenshi humano di un persona mester desaroya.
E diversividad di crimen cu por wordo yama awor castigabel, a aumenta barbaramente cu yudansa di tecnologia nobo pa hende, cu a perde nocion di entre otro berguensa.
Acopla na esaki mundo a bira mas cruel cu influencia di peliculanan cu tin impacto directo riba e moral di un persona.
Den e desaroyonan aki, riba cual DIARIO lo sigui elabora den proximo edicionnan, e chens pa e mucha recien naci bira un criminal y hasta criminal pisa, ta un menasa pa comunidad cu mester cuminsa adapta su leynan tambe.
Mester revisa leynan cu ta indica kico ta crimen pero tambe mester cuminsa revisa leynan cu ta atende cu e oportunidad nobo den creacion di oportunidad nobo pa criminalidad y sigur e forma cu mucha ta perde su nocion humano y ta scoge pa criminalidad como su instrumento pa progreso.
Leynan cu ta atende cu prison den e totalidad di e situacion nobo, mester wordo revisa pa asina crea e siguransa cu un prison no ta bira un motor pa mas y mihor crimen, pero ta haci sigur e criminal hoben conciente di e balor di bida, di hende, di trabou honesto cu den cantidad di caso ta balor desconoci pa demasiado mucha cu ta nace den un ambiente preocupante, promotor di violencia y falta di emocionnan positivo.
Leynan mester wordo adapta sigur pa loke ta trata clasificacion di crimen. Kico ta crimen y kico ta produci crimen y con mester confronta crimen, ta esencial pa habri caminda pa un futuro cu ta rescata normanan y balornan cu ta preveni criminalidad.
“E desaroyo di criminalidad ta avansa hunto cu e desaroyo di tecnologia, cu ta e motibo principal di caida di moral. Un persona cu nace den un ambiente cu no conoce moral, ta un candidato pa criminalidad, cu na e momentonan aki ta uno di e preocupacionnan mas grandi pa comunidad internacional,”ta e informacion cu ta exigi atencion directo di mundo politico, cu a bira un posibel trampolin pa criminalidad si tene cuenta cu tur e casonan penal cu comunidad a conoce ultimo tempo y aparentemente pa un grupo di persona, no ta motibo di berguensa.
