*DCNA ta ricibi mas di 1.7 miyon euro adicional for di Postcode Loterij
ORANJESTAD (AAN): Siman pasa Dutch Caribbean Nature Alliance (DCNA) a ricibi un
contribucion financiero adicional for di Nationale Postcode Loterij. Nan ta ricibi e contribucion aki
ademas di e contribucion multianual di 500.000 euro pa aña. E contribucion adicional ta di gran
importancia pa e trabou di DCNA y lo wordo uza pa proteccion y restauracion di reservanan di
naturalesa den e parti Caribense di Reino Hulandes. Jonne Arnoldussen, director gerente di Postcode
Loterij, a entrega un chek na director di DCNA Arno Verhoeven na Boneiro. Esaki a tuma luga durante e
ultimo reunion di directiva di aña di DCNA, caminda e organisacionnan di conservacion di naturalesa di
e seis islanan tabata presente.
E reservanan di naturalesa den e parti Caribense di Reino Hulandes, manera e rifnan di coral den lama y e palonan di mangel na costa, a deteriora cada bes mas lihe den calidad y cantidad den e ultimo
decadanan. E efectonan di cambio di clima, contaminacion, sobrepesca y especie invasivo ta e causanan
principal di e decadencia aki. E consecuencianan di esaki ta tanto ecologicamente como socialmente
indesea.
E reservanan natural aki ta di gran importancia pa biodiversidad y ta hunga un rol crucial den proteccion di e islanan contra e consecuencianan di cambio di climata. E palonan di mangel por ehempel ta yuda contra ola di tormenta tropical cu ta birando mas frecuente. Ademas, e reservanan natural ta un fuente importante di entrada pa poblacion di e islanan, ya cu e rifnan di coral ta forma un atraccion turistico.
Cu e contribucion adicional di 1.7 miyon euro di Postcode Loterij DCNA por dirigi su mes riba
proyectonan cu ta enfoca riba varios isla pa asina realisa e maximo impacto. Ehempelnan di esaki ta
proyectonan cu ta dirigi riba restauracion di palo di mangrove y vegetacion di tera. E programa regional
aki ta ser desaroya y ehecuta den colaboracion cu e partnernan di aliansa local di DCNA riba e seis
islanan di Caribe Hulandes: Aruba Conservation Foundation, CARMABI, STINAPA, Saba Conservation
Foundation, St. Eustatius National Parks Foundation (STENAPA) y Nature Foundation Sint Maarten.
Wereld Natuur Fonds-Nederland (WWF-NL) ta sostene e programa aki cu conocemento y fondo.
Arno Verhoeven, director di DCNA, ta bisa: "E contribucion adicional aki ta di tremendo balor pa DCNA y pa e reservanan di naturalesa cu tin asina tanto necesidad di nos yudansa.
Danki na e sosten di Postcode Loterij y su participantenan nos por ofrece un futuro sigur y sostenibel na naturalesa den e parti Caribense di Reino Hulandes. Nos kier gradici tur participante na Postcode Loterij pa nan participacion.”
Recientemente DCNA a tuma paso grandi como organisacion riba tereno di bon gobernacion y ta
encurasha e seis organisacionnan afila pa sigui su ehempel. Hellen van der Wal, Presidente di Hunta di
Supervicion di DCNA, ta contento cu e esfuersonan di gobernacion a contribui na e confiansa cu
Postcode Loterij ta pone den e aliansa, loke a haci e contribucion adicional importante aki posibel.
“Postcode Loterij por confia cu e contribucion ta wordo gasta na bon manera!
Jonne Arnoldussen, director gerente di Postcode Loterij: ”Postcode Loterij ta orguyoso di por sostene DCNA den su mision pa proteha naturalesa den e parti Caribense di Reino. Esaki ta permiti e
organisacion pa tuma pasonan hopi importante den proteccion di e naturalesa unico den Caribe. Esaki ta
sumamente importante tambe, pasobra hopi posibilidad di financiamento cu ta disponibel pa e parti
Europeo di Hulanda no ta disponibel aki, mientras cu ta bale la pena pa proteha naturalesa bon.
Riba Potret: Un ricibimento feliz di e contribucion financiero adicional di Nationale Postcode Loterij na Dutch Caribbean Nature Alliance. For di man robes pa drechi: Leslie Hickerson (Director-Nature Foundation St. Maarten), Cai Wulf (Director- Saba Conservation Foundation), Manfred van Veghel (Director CARMABI-Curacao), Tineke van Bussel (Operations Manager- Dutch Caribbean Nature Alliance), Arno Verhoeven (Executive Director- Dutch Caribbean Nature Alliance), Hellen van de Wal (Chair of Supervisory Board- Dutch Caribbean Nature Alliance), Tyson Lopez (Chief Executive Officer- Aruba Conservation Foundation), Kerenza Rannou (Finance Director, STINAPAnaire), Erik Boman (Director- STENAPA, St. Eustatius)
Potret: Nationale Postcode Loterij- tur derecho reserva
