ORANJESTAD (AAN): Director di AZV Edwin Jacobs Dialuna durante un conferencia di prensa a para keto un rato na e cuadro financiero di AZV.
El a trece dilanti cu si nos mira 2019, tabata un aña tremendamente bon pa e fondo di AZV, caminda cu entradanan a aumenta di tal forma cu esaki a surpasa e gastonan.
Esaki a pone cu pais Aruba pa prome biaha den hopi aña no tabata tin mester di duna un contribucion financiero na AZV.
“Na aña 2020 ora cu e pandemia a cuminza e situacion a empeora economicamente, cu a traduci su mes den un reduccion fuerte di entradanan na prima y na BAZV”.
Gastonan a aumenta un poco cu 4 miyon florin na 2020 y Gobierno mester a duna un contribucion di 99.7 miyon florin na e fondo di AZV pa por a cubri e gastonan, segun Jacobs.
El a sigui bisa cu pa 2021 e proyeccion ta mustra cu Gobierno tin cu duna un contribucion di 58.9 miyon florin, mientras cu 94.5 miyon florin a wordo presupuesta.
“E diferencia ta sinta na e crecemento economico cu tabata mas fuerte cu locual nos a premira na momento di e traha e presupuesto di 2021”.
Tambe ta asina cu e gastonan a keda si den e cuadro cu nos a proyecta esaki pa 2021, segun e director di AZV.
Jacobs a splica cu pa 2022 si no implementa e asina yama ‘5 wave model’ di AZV, pais Aruba ta proyecta pa duna un contribucion di 64.2 miyon florin, apesar di e hecho cu entradanan lo crece.
Esaki mirando cu e gastonan den cuido tambe lo aumenta, segun Jacobs.
El a indica cu si aplica e 5 wave model, e contribucion di pais Aruba na e fondo di AZV lo bay ta di 11.6 miyon florin.
