- Pa yuda combati escases den nos forsa laboral
ORANJESTAD (AAN): Diaranson Impact Hub Aruba hunto cu AHATA oficialmente a lansa un programa nobo di desaroyo di forsa laboral pa Aruba, yama Impact Talent Accelerator .
Durante un conferencia di prensa, co-fundador y General Manager diImpact Hub Aruba Mary-Ann Falconi-Rasmijn a splica cu Impact Hub Aruba den su rol di stimula innovacion y crecemento economico sostenible y a crea un impacto pa pais Aruba, a desaroya e programa aki pa duna un respuesta directo na e escases den nos fosa laboral aki na Aruba.
“Como fundacion nos ta hopi conoci den sostene ‘entrepreneurship’ pa Aruba, pero ta e mindset aki specificamente nos kier inculca tambe den nos forsa laboral”.
Despues di sigui e desaroyo di nos mercado laboral nan 2023 y 2024, Impact Hub a sinti su mes yama pa responde activamente, pa trece solucionnan pa e desafionan aki cu nos pais tin, segun Rasmijn.
El a sigui bisa cu Impact Hub a tuma nota di estudionan cu a wordo haci unda cu tin cifranan kizas preocupante pa e fundacion.
Segun Rasmijn, no ta e intencion pa crea panico pero ta importante pa crea concientizacion pa loke ta e impacto economico y social pa Aruba.
“Na comienso di 2025 nos a analisa tur e topiconan cu nos ta bay traha riba dje pa e aña aki y e scarcedad di forsa laboral a bin dilanti, unda cu nos a sinti cu nos tin cu contribui y basa riba datonan cu nos a ricibi di Camara di Comercio di un encuesta cu nan a haci na 2024, e preocupacion a crece”, segun e General Manager di Impact Hub.
El a indica cu mirando cu e problemanan den e añanan cu ta bin por bira hoi mas severo, a dicidi di actua aworaki.
Segun Rasmijn, na Aruba tin un desbalance entre habilidad y necesidad di mercado y tin tambe e problema di enbehecimento den e forsa laboral.
A descubri cu aworaki na Aruba tin alrededor di 8700 persona entre edad di 60 cu 64 aña, pues nan ta yegando edad di pensioen.
“Esaki ta nifica cu den e proximo añanan nos ta bay tin un gap di sigur 8000 persona”.
Otro factornan cu nos a identifica ta participacion limita den mercado laboral.
Ta trata di gruponan vulnerable den nos comunidad manera hobennan di entre 18 y 22 aña riba bijstand y mamanan cu no tin recursonan financiero pa duna cuido na nan yiunan, segun Rasmijn.
El a bisa cu esaki ta inclui tambe adultonan mayor cu kier drenta mercado laboral.
Como solucion Impact Hub via su programa kier cambia e narativa y trece cambio door di brinda oportunidad na tur grupo den nos comunidad, unda cu no solamente bo ta mihor prepara pa e mercado, sino bo ta ekipa cu e mindset y encontra bo proposito personal y profesional.
E programa ta pa tur persona cu y sin empleo.
Pa participa na e programa bo por subi riba e website yama Impact-Talent.net pa registra.
