Carlos Martinus, director OABA:
- Tur estudio cu nan ta duna ta riba nivel halto
ORANJESTAD (AAN) Señor Carlos Martinus, Director di OABA, a declara pa Matutino DIARIO, cu tur estudio cu nan ta duna, ta riba un nivel halto.
“Riba nivel 1, cu ta Asistent, cu ta nan prome diploma mayoria ta bayendo nivel 2, pa mehora nan mes den e mercado. Mayoria di nivel 2 ta traha caba, unda cu nan doño di trabao a manda nan sigui, y tur tin un salario caba, y hasta tin cu ta bayendo pa nivel 3. Kiermen cu e studiantenan aki ta bay dilanti, sin duda”.
Martinus a sigui splica cu pa e siguiente aña escolar OABA ta hincando basta energia den PR, pa informa tur hende tocante nan estudio. Semper nan ta cuminza un par di siman mas laat, pa alumnonan cu pa un of otro motibo no a haya scol den dia, semper ta bonbini cerca OABA.
“Nos tin plan pa cuminza nivel 1 y 2 y probablemente 3, cu Electro y full techniek. Nos ta casi cla cu e documentonan pa nos por cuminza na September, of mas tarda October”, Meneer Carlos Martinus a splica.
El a subraya cu nan aña escolar ta cuminza un tiki diferente na scolnan den dia. Nan ta cuminza dos biaha pa aña y tin biaha tres. Hopi alumno ta wordo kita for di scol of nan no ta wordo tuma na EPB, of MAVO, anto nan ta acerca OABA. Anto, scol kier cuminza semper na Januari of Februari.
El a agrega cu OABA ta hayando hopi peticion di companianan pa wak kico nan por duna e trahadornan. Nan ta haya un certificado, loke a bira popular na Aruba.
