Impact Hub Aruba a bira un plataforma di crecemento y innovacion pa yuda tur 'entrepreneur'   

Mary-Ann Falconi-Rasmijn, GM y Co-fundado:

*Cu e meta unico di prospera e economia di Aruba 

ORANJESTAD (AAN):   Impact Hub Aruba ta un organisacion cu a wordo estableci na aña 2022 cu e meta unico di prospera e economia di Aruba, stimulando negoshinan chikito door di duna nan recursonan, conocemento y un espacio unda nan por traha.

            Durante cu nan ta na Impact Hub nan ta wordo guia directo of indirectamente pa nan crecemento den un manera mas acelera.

            Mary-Ann Falconi-Rasmijn, Co-fundado y General Manager di Impact Hub Aruba a relata den un entrevista cu DIARIO cu e miembronan ta traha den un ambiente caminda tur hende tin e mesun pasion y e mesun metanan di crece bira grandi.

            Loke ta ripara ta cu ora cu e mentenan ta pensa riba e mesun nivel nan ta stimula otro, yuda otro y esey ta e filosofia di Impact Hub y nan ta djis tey pa support nan den e proceso ey di diseña proyectonan pa nan ta parti di dje pa medio di trainingnan, sesionnan interactivo, 'brainstorming' organico a traves di combersacionnan diario.

            Esaki ta e manera con e comunidad ta funcionando aworaki y e ta resultando hopi bon. E acogida y aceptacion ta grandi, Falconi-Rasmijn a indica.

            Despues di dos aña di a lansa e plataforma di Impact Hub Aruba por bay bek y haci un analisis y locual ta constata ta cu na Aruba tin hopi entrepreneur cu ta traha den nan camber, na un cafe, pero nan ta hopi nan so, a remarca.

            No tin un manera facil pa haya sa ken nan ta. Solamente ora tin un actividad social, pero hopi biaha e actividadnan social ta e companianan estableci ya caba ta bay y no tin oportunidad pa esnan cu ta cuminsando bini hunto, conoce otro, crea algo hunto.

            "Aruba ta un isla unico y nos ta tuma un tiki mas pa nos adopta un mentalidad nobo. Pa nos adopta actitud innovativo y pa finalmente nos tuma accion pa haci algo fuera di nos zona di comodidad", Mary-Ann Falconi a expresa.

            Na 2022 Impact Hub a cuminsa cu 4 miembro y a haya un tiki duda si e proyecto lo por a logra. Tabata conoci cu e necesidad t’ey, pero e reto tabata pa e hendenan yega na Impact Hub.

            "E prome aña e struggle tabata hopi significante. Despues di dos aña a cuminsa ripara cu un ta bisa otro, cu un ta bin cu otro start-up y asina nos a cuminsa crece", a bisa.

            Na inicio di e di dos aña, na 2023 e cantidad di miembro a crece y a cera e aña ey cu algo mas cu 40 miembro activo. E cantidad ta varia y esey ta loke ta haci e modelo diferente ya cu e ta traha y ta adapta segun e necesidadnan.

            Tin hende cu ta traha eynan tur dia. Otronan ta haci uzo di e espacio riba cierto dianan. Toch, Impact Hub Aruba ta un ambiente caminda tur hende ta wak otro manera colega, e GM di Impact Hub Aruba a señala.

            Aña 2024 a habri cu 72 miembro y aworaki cu e programa O'stad200 Incubator ta na 96 miembro. Asina por wak con e interes di e entrepreneurnan ta creciendo. E meta ta pa den un futuro cercano e hobennan profesional por ta riba nan mes y cu nan por escala nan proyecto, nan negoshi.

            "Ta un fase bunita pa wak nos miembronan crece. Ora cu nan ta haya clientenan pafo di Aruba of cu nan a cuminsa haya clientenan chikito y cu diripiente ta haya clientenan nobo grandi (...) Ora cu nos miembronan crece nan ta sigui expande cu nan propio oficina, nos ta wak un fluho nobo di start-ups cu ta drenta cu e mesun proceso", MaryAnn Falconi a indica. E enfasis ta pa yuda desaroya economia.