Imagen di hoben Arubiano special Jake Lacle a aparece riba pantayanan gigantesco den Times Square

Actividad di National Down Syndrome Society di Merca

ORANJESTAD (AAN): Recientemente e hoben di Aruba, un modelo cu Down Syndrome, esta Jake Lacle di “Sea Bunita Sea Bo Mes” a sali riba algun pantaya gigantesco (billboard) famoso cu tin den Times Square, na ciudad di New York.

   Esaki a worde estrena mientras cu miles di persona por a wak e evenemento aki

cu National Down Syndrome Society (NDSS) a organiza riba Times Square na New York pa 2024. Anualmente NDSS ta recorda riba e “cariño special” cu personanan cu Down Syndrome tâ influencia den nos Comunidad. Durante un presentacion riba e bilboard den Times Square na New York, como 500 persona cu ta consisti di mucha te cu adulto cu tä Down Syndrome a worde presenta.

   E video mas bien ta un forma di recorda y contribui logronan y balor cu personanan cu Down Syndrome tin den nos comunidad. E meta di NDSS ta pa crea concientizacion, aceptacion y inclusion pa e personanan cu tin Down Syndrome.

   Masha hopi famia a bin for di tur skina di mundo y a topa na New York pa participa den diferente evento cu a worde organiza pa NDSS. Despues di mustra e video riba Times Square tur participante a asisti na diferente evento cu e organizashon a presenta. Tabata tin entre otro un ceremonia di apertura di NYC buddy Walk, un fiesta pa entrega di premio. Tur esakinan a worde transmiti virtualmente na mas cu 150 ciudad na Merca y tambe den diferente parti na mundo caminda mas di 325 mil persona a conecta via di internet.

   Esaki ta un otro evenemento cu NDSS cual ‘Fundacion Sea Bunita Sea Bo Mes’ ta forma parti, a logra organiza, caminda Jake Lacle di Aruba y tur otro persona cu Down Syndrome por a participa.

   Esaki sigur ta un tremendo logro pa Aruba. Fundacion Sea Bunita Sea Bo Mes ta invita pueblo di Aruba engeneral pa bin apoya nos hendenan special diasabra dia 16 di November na Renaissance Convention Center unda cu nan lo demostra na tur hende nan talentonan. Ta bay tin hopi sorpresa e anochi aki cu nos hendenan special mes lo bay haci y e lema di e show ta: “Stima ta inclui y no ta Exclui”.