ILO Caribe ta na Aruba pa monitorea con e situacion ta cu dialogo tripartite ta funciona

Hose Figaroa di Sindicato FTA

ORANJESTAD (AAN):   Hose Figaroa, Presidente di Sindicato FTA, a duna di conoce cu recientemente nan a participa na e Congreso Internacional di Trabao di International Labour Organization, cu a tuma luga na Ginebra, Suisa. Esaki ta un evento anual unda cu tin participacion di tur pais rond mundo den forma tripartite, esta dunadonan di trabao, trahadonan y gobierno.

            Figaroa a splica cu den e congreso aki ta discuti riba diferente tema y ta bin cu recomendacionnan cu ILO ta saca y ta wordo discuti. E aña aki tabatin tres tema central manera peligernan biologico na pia di trabao, formalisacion di esnan cu ta den economia informal y regulacion legal di esnan cu ta traha den plataformanan digital (online).

            FTA a forma parti di e discusion ultimo aki ya cu ta mira cu den futuro cercano esaki lo por ta mas comun na Aruba. E punto di salida di ILO ta pa tin consenso tripartite y esaki no a bay facil, el a indica.

            Hose Figaroa a agrega cu otro aña e tema aki lo ta ariba agenda atrobe pa purba di yega na un resolucion.

            ILO tabata hopi intensivo cu dianan hopi largo cu discusionnan cu a bay te na marduga unda cu riba e tema ey no a avansa hopi, pero e dialogo ta continua. 

            Banda di esaki el a bisa cu tin bishita di ILO Caribe na Aruba cu ta purba di monitorea con e situacion ta cu dialogo aki na e isla, specialmente con e dialogo tripartite na funciona. Lo reuni cu entre otro SER (Sociaal Economische Raad) pa wak con en general e dialogo ta funciona na Aruba y con leu nan como ILO Caribe por duna asistencia tecnico pa por agilisa e proceso aki.