*Un actividad cu ta abarca mucho mas cu movecion y deporte
ORANJESTAD (AAN) – Den conferencia di prensa di CEDE Aruba, Diadomingo cu a pasa, a elabora tocante e proyecto Ban Caya, cu a wordo lanza den dicho encuentro cu prensa y cu lo tuma lugar dia 10 di September proximo, na Noord.
Ban Caya ta un proyecto cu a wordo crea tanto pa IBiSA como CEDE Aruba y Gobierno, na unda cu haci un ciclovia ta un experticia di IBiSA y e parti social ta experticia di CEDE Aruba cu a uni den un “joint venture” den e caso aki, no solamente pa haci movecion sino pa haci henter e comunidad di Noord conciente, di kico su bario tin pa ofrece. Esaki n o solamente den deporte pero diferente organizacion, fundacion, cu por duna nan conocimento na henter e bario di Noord, y den e caso aki haci di Centro di Bario Noord e centro principal na unda tur hende ta topa y unda tur hende por trece nan famia hunto manera e idea ta.
Centro di Bario Noord ta un centro activo caba, no solamente pa adulto pero pa grupo di hoben, y esaki cu hunto nan por haci cosnan positivo dunando e stempel aki, e semia den e bario di Noord, pa esaki sigui despues.
Ban Move den cayanan di Noord ta cuminza dia 10 di September proximo, pa 3 or di atardi te cu 7 or di anochi. Tin un cantidad grandi di organizacion cu a cuminza, ya caba nan ta yegando 50 organizacion y fundacion deportivo cu ta riba caya haciendo deporte.
Pa loke ta trata cayanan di Noord cu ta wordo cera, cuminzando dia 10 pa 12 or di merdia, ta e cayanan patras di Compleho Deportivo Frans Figaroa, net dilanti di Colegio Felipe Tromp. E lorada cu ta coi net na muraya di Compleho Deportivo y yega te na rotonde conoci como “rotonde di Fermins” di aki ta bira bay te e ultimo caya prome cu Imelda Hof.
IBiSA hunto cu Kleuterschoolnan ta organizando futbol riba caya. Ta bay tin un 'health street' na unda ta bay tin oportunidad pa, entre otro, sa kico ta come y bebe saludable, lo ta presente nutricionista, masahistanan, personanan cu ta haci pedicure y manicure riba caya, fuera di locual ta deporte. Importante ta pa informa cu no ta solamente movecion pero tambe cosnan pa e persona mes, manera meditacion, yoga y tur esakinan cu ta yuda bo salud, tambe ta wordo poni durante e atardi aki.
