Rafael Perez-Coordinador:
RANJESTAD (AAN) – Rafael Perez Guardiola, coordinador di Turibana Race na Instituto Biba Saludable y Activo (IBiSA), a referi na e Duo Gubernamental, cu tin basta aña ta participa den Turibana Race.
“E aña aki nos ta bay cuminza cu algo cu tin den plannan pa basta tempo, cu ta e Copa Rotativo Gubernamental. Nos ta dienst di Land Aruba, nos ta promove salud y movecion, pero nos ta lubidando nos mes dienstnan.
“For di aki mi ta manda un invitacion na tur e dienstnan di Lands Aruba, pa participa. E Copa Rotativo, ta bay wordo gana pa e team cu tin e miho tempo. Duo male, female y mix. Den nan tres, esun cu tin e miho tempo, lo bay cu e Copa.
“E ta intencion tambe pa cada 5 aña, e di cinco ganador ta haya e Copa. Asina aki nos ta incentive salud y movecion den nos mesun hendenan”, el a subraya.
El a expresa palabra di gradicimento na staf y personal di IBiSA, KPA, DOW, Motor Union, SETAR, Arubus, boluntarionan, entre otro.
Ademas el a pidi tur chauffeur, pa tene cuenta cu dia 7 di September venidero, entre 3.30 or di madruga pa 6.30 or, e caminda dilanti di e panaderia na Noord, lo bay ta parcialmente cera. Tene cuenta cu ne, y cu e ruta ta sali bay riba caminda grandi, bay rotonde di Tanki Flip, bay stret pariba caminda di kibaima, Pos Abao te Centro Deportivo Betico Croes. “Tene cuenta cu e seguridad di nos participantenan, y tur e hendenan cu ta bay ta riba caminda yudando nos”, Rafael Perez Guardiola, coordinador di Turibana Race, a conclui.
