Un siman di vakantie den October
ORANJESTAD (AAN): Rodymar Geerman, Hefe di Departamento di Desaroyo di IBiSA, hunto cu señora Candi Peña, Camp Coordinator di IBiSA, durante conferencia di prensa dialuna mainta, a duna informacionnan hopi elabora riba nan proximo evento pa hubentud den vakantie di october proximo. Youth Adventure Camp (YAC) ya ta ser organisa pa 5 aña caba cu e meta pa entrene hobennan di 13 pa 17 aña durante vakantie di 13 pa 17 di october y lo cuminsa for di 8’or di mainta pa 12’or di merdia. Tur dia e muchanan mester yega na Linear Park prome cu 8or di mainta pa di ey cuminsa cu e programa di dia na unda cu lo bay diferente parti rond di Aruba.
Señor Geerman a duna di conoce cu, di e manera aki, por brinda hobennan, cu no ta bay biaha durante e vakantie, henter un siman largo di actividadnan sano. Aventuranan cu tin riba programa ta entre otro, hiking, defensa propio, paddle, crossfit y diferente tayer educativo.
E aña aki tambe, IBiSA ta mantene e cantidad di participante na 30 mucha so. E proyecto ta hopi intensivo y si mester expande, lo tin mester di mas personal tambe. IBiSA ta premira y tin un plan pa expande pa otro aña, mirando e interes den e programa.
Señora Candi Peña, a spica cu mayornan por registra via pagina di Facebook di IBiSA. Mester haci e pago cash di 50 florin na IBiSA Playa of IBiSA San Nicolas. Door cu cupo ta limita, e prome 30 muchanan cu haci pago, lo ta esunnan cu lo participa na e siman di aventura di IBiSA. Y pa disfruta mas tanto posibel, ta pidi pa muchanan bin cu paña deportivo, petchi y boter pa awa.
Tur dia muchanan lo haya cuminda cayente, snack y fruta. Muchanan cu tin dificultad pa come tur cos of loke cu IBiSA ta ofrece, por hiba nan mesun cuminda. Ta conseha tambe pa no hiba nada balioso pasobra IBiSA no ta para responsabel pa loke ser perdi.
