ORANJESTAD (AAN)— William Erasmus, Hefe Suplente di IBISA y su colega Glen Benjamin-Lacle, a yama un conferencia di prensa Diabierna 7 di Januari awo, unda a duna informacion tocante e prome careda di aña 2022.
William Erasmus a comenta cu esaki ta e di 26 edicion di e asina yama “Careda Betico Loop”, cu lo tuma lugar dia 25 di Januari, pa 6 or di mainta, na Centro di Bario Betico Croes, manera tur aña.
Erasmus a subraya cu nan ta sigui e protocol di DVG, pa purba mantene e seguridad di nan partnernan y di e comunidad di Aruba, y ta hopi importante pa tur hende tene cuenta cu esaki.
E actividad ta bay wordo haci den “wave”, kiermen tur hende tin e oportunidad di participa na un actividad deportivo pa asina nos mantene e parti di salud mental y fisico di e persona, cu ta hopi importante.
No obstante, IBiSA ta reserva su mes e derecho di si bin cambio den protocol, cu lo por trece esaki den nan careda tambe. Por ehemplo, si nan dicidi cu e carera mester bay cu menos participante, mester haci esaki, y por ta, ta kibra e “wave” di e caredanan den mas diferente horario, pa asina minimiza e cantidad di personanan cu ta participa na mesun momento. Y si mester postpone y pase pa otro fecha, tambe esey por sosode.
“Na e momentonan aki tur cos ta bon; DVG tin e preferencia pa deporte por sigui, kiermen bay purba mantene e miho di esaki. Registracion a start dia 7 di Januari pa 10’or y por subi na e facebook page di IBiSA, unda ta haya un link caminda por registra pa e careda aki”, William Erasmus a duna di conoce. Participacion ta mara na un suma tanto pa hende local como di afo.
El a agrega cu ta bay tin un cupo limita di 500 participante, pa asina por sigui toch cu e careda aki. E lo ta di 6km y 10 km. Erasmus a sigui splica cu e careda ta start 6 or di mainta, cuminzando cu e distancia di 10 kilometer, cual aworaki ta calibra oficialmente. Despues di esaki tin 10 minuut di break y e siguiente grupo ta sali pa 6.10 y e siguientenan ta cada 5 minuut, y lo purba haci esaki den cinco wave, loke kiermen cu ta bay caba trempan, pero tin e distanciamento entre e participantenan.
E carera di 6 y 10 kilometer ta pa edadnan di 17 aña bay ariba. Esaki tin dos aña ta haciendo caba y lo purba di mantene asina.
Pa motibo di covid e premiacion lo tuma lugar na un diferente dia. Esaki lo ta dia 27 di Januari di 5’or di atardi pa 7’or di anochi. E dia di e careda mes esun cu ta caba di core por bay cas. Asina William Erasmus a conclui si parti di informacion, y Glen Benjamin Lacle a sigui cu mas detaye.
