Wil Erasmus ta anuncia:
ORANJESTAD (AAN)—E director interino di deporte, na IBiSA, Wil Erasmus, den conferencia di prensa a anuncia e IBiSA camp 2023.
El a comenta cu tur aña nan ta organiza e campamento aki, cu ta algo cu Ministerio ta pone accesible pa e muchanan den vacacion, y e aña aki no ta diferente.
IBiSA ta organiza e camp aki hunto cu e Comision di Subsidio. E aña aki ta bay tin dos siman di campamento y cada un ta tuma mas of menos cien mucha, y ta bay tin dos camp di manera simultaneo: un pariba y un pabao, cada siman. E ta tuma lugar di 17 pa 21 di Juli y di 24 pa 28 di Juli.
Erasmus a extende un invitacion na tur mayor pa inscribi nan yiunan na tempo. Por haya e registracion riba IBiSA su pagina di Facebook, pero ya a cuminza cu e pago na IBiSA Playa y IBiSA San Nicolas. El a señala cu no pasobra e mucha ta registra na tempo su lugar ta asegura. Esaki ta sosode na momento cu e mayor haci e pago. E pago a cuminza Diahuebs y Diabierna caba, pero tambe e siguiente siman. Erasmus a acentua cu e prijs ta hopi economico, pasobra gobierno kier hacie pa comunidad basicamente, y tin hopi actividad, cu ta cuminza di 8’or di mainta pa 12’or di merdia. E muchanan ta bay haya cuminda y flanel.
“Mi kier invita e comunidad di Aruba completo pa inscribi nan yiunan y pasa paga mas lihe posible pa nan no perde nan chens”, Erasmus a reitera.
