ORANJESTAD (AAN): Durante un conferencia di prensa di IBiSA Diahuebs, miembro di e management team di IBiSa Edgar Erasmus a papia riba lanzamento di e website di IBiSA.
“Despues di hopi tempo nos a logra keda cla cu esaki y awor nos ta bay lanza e website pa asina comparti informacionnan importante di e actividadnan cu nos ta haci”, Erasmus a indica.
El a sigui bisa cu IBiSA ta haci hopi pa locual ta actividad fisico, pero tambe ta promove e parti di salud.
“Nos ta haciendo asina hopi cos cu nos kier comparti cu comunidad”.
E website aki lo bira un medio cu nos ta bay uza pa comunica cu comunidad, segun Erasmus, kende a bisa tambe cu riba e website bo por lesa e parti di historia di e departamento, unda cu antes bo tabata tin IDEFRE.
Bo ta bay por wak tur e actividadnan pa hende grandi y pa mucha, mientras cu ta bay tin informacion riba e servicionan cu nos ta duna na comunidad, manera entre otro presta materialnan pa eventonan, segun Erasmus.
El a sigui bisa cu riba e website bo ta haya informacion tambe di federacionnan di deporte manera karate y futbol, pa asina por ehempel bo por inscribi bo yiu.
Pesey Erasmus ta stimula tur hende pa subi riba e website pa busca tur tipo di informacion y si bo no haya e informacion cu bo ta busca bo por yama IBiSA.
