El a cumpra ticket via Lotto Online
ORANJESTAD (AAN): E sorteo di Lotto 5 di Diaranson anochi tabatin hopi persona pendiente pa e sorteo.
Ora cu e numbernan a sali, esta 10, 15, 28, 29, y 33, hopi persona a kere cu ningun hende lo gan’e, como cu ta ‘numbernan halto’ esey ta.
Pero rond di Aruba tabatin un solo persona feliz y contento! Ta trata di Ever, kende a purba su suerte cumprando su numbernan usando e boton ‘Random’ riba e servicio di Lotto Aruba Online.
E computer a genera e numbernan ey. Nan ta enberdad ‘number halto’, pero pa Ever nan a bira “numbernan di suerte”.
Pesey mes el a acudi Diahuebs na oficina di Lotto na Playa cu su Lotto Online pa reclama su premio. Cu e Lotto Online bo por print un pagina PDF na bo printer, y esaki tin mes validez cu un ticket.
Na sede di Lotto, a confirma cu Ever a gana e jackpot di 800.000 Florin cu e wega di Lotto 5.
Mesora a cuminza cu e proceso pa transferi e premio gordo aki pa Ever su cuenta di banco. Un palabra di pabien na Ever cu e premio aki.
