Iberostar a trece pa Aruba un mezcla sin paralelo di acomodacion luhoso y sostenibilidad

Cu inmenso reconocimento na herencia cultural di e isla

ORANJESTAD (AAN): Siman pasa, Iberostar Hotels & Resorts cu ta e marca hotelero di Spaña y cu ta mundialmente reconoci, a habri JOIA Aruba by Iberostar, nan prome hotel na Aruba, na Eagle Beach.

   E resort aki di cinco-strea, ta ofrece un mezcla sin paralelo di acomodacion luhoso, sostenibilidad, y un celebracion di e herencia natural di e isla.

   Iberostar Group su dedicacion pa promove y sigui lidera e pasonan pa turismo responsabel, lo bay ta haciendo esaki cu e Hotel aki tambe.  Cu e apertura aki, Iberostar ta aplicando e siete pilarnan di su strategia di ‘Wave of Change’ pa promove economia circular, naturalesa, y proteccion di biodiversidad, y accion di clima.

   For di tur 240 camber di suite lo bo por mira Lama Caribe, y e Hotel a inculca sostenibilidad na tur nivel, for di e uso di material recicla haya localmente (incluyendo e muraya di e edificio), te na elementonan di diseño inspira pa Aruba cu ta celebra asina e cultura rico di e isla.  Cu interior traha pa confort y preservacion di recurso, y amenidadnan inovativo manera productonan organico y sistemanan di fluho di aire cu ta eficiente cu energia, nan ta redefina luho responsable mientras ta elimina plastico di un solo uso.

   DIARIO a compronde cu e hotel ta habri na comunidad tambe, pa bay check y disfruta di nan restaurantnan, e spa, bar, y e hotel mes.  Esey ta loke gerente general Arnaud Le Lanchon a bisa.  Ademas di acomodacion luhoso, JOIA Aruba by Iberostar ta ofrece comemento di clase mundial, cu tres restaurant cu ta habri tambe pa comunidad local.  Nan tin un restaurant cu mainta ta ofrece Desayuno estilo buffet, pero anochi ta bira den un restaurant specializando den Cuminda Italiano.  Tambe tin un Restaurant di Cuminda Caribense Moderno.  Tambe tin un Open-Fire Grill specializa den Surf and Turf.

   E hotel tin cuatro bar, incluyendo un swim-up bar, un gastropub.  Nan lo tin un Convention Center tambe di 930 meter cuadra cu por acomoda 400 persona.  Tin un spa, fitness center, dos piscina cu Bali beds, y lugar special pa bruid of otro evento.

  Parti panort di e edificio, JOIA Aruba by Iberostar tin un lokaal pa duna les cu ta wordo yama ‘Aula di Lama’, cu ta un espacio multifuncional cu lo sirbi como un hub di colaboracion pa duna les na scolnan na Aruba, cu ta bay eynan pa haya sa tur cos riba educacion di medio ambiente, pa trece mas concientizacion cerca studiantenan riba e topico di proteha naturaleza y mas.

  Pa lunanan di ‘spring 2025’, nan tin planea pa un ceremonia di Grand Opening.