PHILIPSBURG: Estadistica cu Cuerpo Policial di St. Maarten (KPSM) a caba di emiti, relacion cu joyriding y/of ladronicia di auto den e prome mitar di 2023,
a mustra cu e auto compacto Hyundai i10 ta e auto mas horta riba St. Maarten. Ladronnan ta mik principalmente riba dos tipo di i10, esta esun di prome generacion i10 di 2008, y tambe e Grand i10 cu a wordo lansa na 2020.
Hyundai Tucson tambe ta wordo busca door di ladronnan. Pero en general, riba e isla e doñonan di Hyundai ta core e riesgo di mas grandi cu nan auto lo wordo horta, sigui pa esnan cu ta core auto marca KIA.
Den e prome seis luna di 2023, un total di 24 Hyundai a wordo horta, y ocho auto marca KIA. Ta trata aki di 4 auto KIA Picanto, y 4 vehiculo KIA Sportage.
“E estadistica aki ta mustra e importancia pa doñonan tuma medida di seguridad pa autonan di marca Hyundai y KIA,” ta loke St. Maarten Police Force a indica den un boletin. “Nos ta urgi tur doño di auto pa keda vigilante y tuma e medidanan necesario pa proteha nan propiedad di ladronicia.”
E cantidad di Hyundai i10 cu a wordo horta ta 18 auto. E cantidad di Hyundai Tucson cu a wordo horta ta 6 vehiculo.
Polis a papia tambe di e horario cu e autonan a wordo horta. Aunke esaki por socede ki ora cu ta, nan analisis ta cu tin hopi ladronicia entre 6:00 pm y 10:00 pm. Tin mas hopi caso ta socede entre 10:00 pm y 6:00 am. Tambe tin algun caso cu ta socede entre 6:00 am y 10:00 am. Mayoria di e autonan ta wordo horta den weekend. Di e total di 62 auto horta den prome mitar di 2023, un parti grandi (31 auto) a wordo horta den weekend, y riba Dialuna.
Di e 62 autonan aki, un alarmante 21 auto a wordo horta for di companianan di Car Rental.
