Parlamentario Marco Berlis (MEP):
ORANJESTAD (AAN): Ya pa algun aña caba gobierno ta negociando cu Hulanda, pasobra ni gobierno ni mayoria di Parlamento a bay di acuerdo cu e RAft. Fraccion di coalicion sigur a establece den un mocion pa gobierno bay y busca normanan mas flexibel y a pidi gobierno tene cuenta cu varios punto cu Parlamento lo desea pa wak den e acuerdo. Di e forma aki gobierno cu sosten di mayoria di parlamentarionan a continua negociacion cu Hulanda pa trata na yega na un acuerdo riba un “Hybride” Rijkswet.
Acuerdo aproba pa Ministerraad di Hulanda y Aruba
E acuerdo cu gobierno a yega cu Hulanda ta encera algun punto manera:
- A tene cuenta cu mocionnan entrega den Parlamento pa por a yega na un acuerdo cu Hulanda den forma di un Hybride Rijkswet.
- Interes riba e lening di COVID-19 cu awo ta 6.9% ta baha inmediatamente na 5.1%.
- Manera cu firma e acuerdo lo cuminsa traha riba e Rijkswet cu mester keda cla pa mas tarda 1 di mei 2025.
- Ora cu e Rijkswet keda cla lo baha e interes di e debe di COVID-19 ta baha di 5.1% na 3.4%.
- Hecho historico: Hulanda ta dispuesto pa financia parti di Aruba su debe externo na 3.4% despues cu Rijkswet a keda cla y firma.
- Lo bay tin un exit-bepaling. Esaki kiermen cu e Hybride rijkswet lo keda na vigor te ora cierto condicionnan economico y pago di debe keda alcansa.
- Lo revisa normanan financiero pa asina mas inversion por tuma lugar den nos pais. Hulanda y Aruba ta di acuerdo pa IMF investiga ki normanan lo mester cambia. Aunke e rapport aki no ta bindend, a acorda cu lo us’e pa Aruba y Hulanda yega na un acuerdo riba e normanan financiero.
- Cu e acuerdo riba e Hybride Rijkswet, gobierno lo mester paga 16 miyon florin menos na interes riba e lening di Covid anualmente.
- RAft ta keda oficialmente destrui e momento cu firma e acuerdo di e Hybride Rijkswet. Esaki ta un logro grandi ya cu Raft lo tabata un strobacion pa e crecemento social economico y financiero pa nos pais.
- CAft lo permanece como e organo di supervision financiero den e acuerdo.
- Aruba lo por realisa proyecto PPP cu e condicionnan cu e mester wordo haci na un forma responsabel y mester cumpli cu cierto criteria.
Mansur, Gerlien, Marisol y Gunn a grita pa firma Raft pa caba!
Ta importante pa subraya con politica baho a wordo hiba pa Mansur, Gerlien y Marisol mientras ainda gobierno tabata negociando cu Hulanda. Tur e coleganan aki a keda ridiculisa, cuestiona, y bagatelisa esfuersonan genuino di nos coalicion y gobierno. Nan tur a grita pa pasa e RAft manera cu e ta! Nan no a boga pa ni un cambio, aunke nan a expresa den e “zienswijze” di e RAft cu nan tabata preocupa.
E cara dobel di e politiconan aki awe a keda na berguensa. Specialmente Gerlien Croes, cu gusta instiga den prensa mal informando pueblo y ta hunga politica barata. Gerlien su temporada den AVP tabata CONTRA e RAft, a bay independiente y diripiente a flip-flop grita e ta VOOR y cu gobierno mester firma rapido. Politiconan no ta respeta e proceso di negociacion intenso entre Aruba y Hulanda basta nan por sigui gaña pueblo. Pueblo a tuma nota di boso caba!
