Hurricane Hunter a ateriza na Aruba

ORANJESTAD (AAN): Diahuebs mainta pa 10:15 am, e avion Lockheed WP-3D Orion a lanta vuelo for di Lakeland (Florida),

y a bula pa 3 ora y 50 minuut, pasando e.o. riba Cuba, te ora cu el a ateriza na Aeropuerto Internacional Reina Beatrix.

   E avion aki cu matricula N42RF, ta un di e famoso avion ‘Hurricane Hunter’ cu National Oceanic & Atmospheric Administration (NOAA) ta dispone di dje, pa haci trabao di controla mal tempo pa detecta informacion valioso pa National Hurricane Center na Florida.

   Nan a bin Aruba, pasobra e isla ta bira un base ideal pa nan por lanta vuelo y bay check condicion di Tormenta Tropical Elsa cu ta birando cada rato mas fuerte riba Oceano Atlantico.  Pa awe Diabierna, e mal tempo aki lo drenta Caribe, posiblemente como ‘Horcan’.