Ministro Geoffrey Wever:
ORANJESTAD (AAN): Durante e conferencia di prensa riba 18 di april, Minister Geoffrey Wever den cooperacion cu Kamer van Koophandel Aruba (KvK) a anuncia un mision comercial pa Colombia den siman di 22 di mei 2023.
Colombia ta importante pa desaroyo economico di nos pais. Banda cu nos hendenan tin lasonan familiar cu Colombia, e ta un pais cu nos hendenan gusta bishita. E laso di negoshi tambe ta grandi. Colombia ta den e top 10 di paisnan mas importante pa nos economia. Ta importante inverti pa mantene, fortifica y intensiva e laso comercial cu Colombia.
P’esey den cooperacion estrecho cu Kamer van Koophandel Aruba ta organiza un mision comercial. Sector priva a vocifera kico ta nan deseonan y e oportunidadnan cu e mercado di Colombia tin pa ofrece, tambe con gobierno di Aruba por facilita esaki. A base di tur e informacion aki a traha un programa unda minister Geoffrey Wever y e delegacion di comerciantenan lo bay como team pa hunto bishita e pais y traha pa stimula mas comercio.
Mision comercial ta un di e instrumentonan importante den maneho economico di un pais. Meta di e mision comercial ta pa – banda di fortifica e cooperacion economico entre e dos paisnan – tambe facilita cu negoshinan di Aruba tin mas acceso na e mercado Colombiano, y vice versa. Tipo di delegacionnan asina ta contribui na stimula e conexionnan necesario pa nos consumidornan por tin mas escogencia den productonan y servicio, na diferente prijs y calidad.
“Ta importante pa accentua e realidad cu Aruba su economia ta uno chikito y ta depende riba importacion di mayoria di su productonan”, segun minister Geoffrey Wever. “Colombia no ta keda leu di nos pais y ta esencial pa explora oportunidadnan comercial cu Colombia tin pa ofrece cu por trece beneficio pa nos comerciantenan y consumidornan”.
Un invitacion ta bay na tur comerciante cu sea kier importa of exporta pa Colombia, of crea otro lasonan comercial, pa participa na e sesion di informacion di KvK diahuebs awo, 20 di april 2023, pa haya sa con como comerciante por participa na e mision comercial y asina haci e mision comercial uno mas fructifero.
