Hulanda ta acepta proposicion di Aruba pa sigui negocia a base di un solucion 'hibrido'

Prome Minister Evelyn Wever-Croes

*Ta trata di un Ley di Reino y un Ley local 

ORANJESTAD (AAN):  Diahuebs mainta, den Parlamento a tuma luga e reunion publico na unda cu Gobierno di Aruba a duna un update riba negosacionnan cu ta tumando luga cu Hulanda. Desde e reunion di dia 22 di augustus, Parlamento a indica den ki cuadro nan lo kier pa Gobierno sigui negocia cu Hulanda.

            Ya pa e siguiente dia, dia 23 di augustus, Gobierno a cuminsa deliberacionnan cu e ekiponan di e profesionalnan y despues tambe a cuminsa delibera riba nivel di gobierno pa gobierno. Gobierno di Aruba a haci un proposicion pa yega na un acuerdo riba liñanan grandi.         Den e acuerdo aki, Gobierno a propone pa traha cu un solucion hibrido, un Rijkswet, Ley di Reino, cu ta regla algun aspecto y un Landsverordening, un ley local, cu ta regla algun aspecto. Den esaki a laga Parlamento cu tur su autoridad y su autonomia. “Esaki ta loke cu Parlamento a indica tambe y esaki nos a ofrece na Hulanda”, Prome Minister a remarca.

            Prome Minister a duna di conoce cu den e acuerdo aki, Gobierno a pone e condicionnan cu Parlamento a indica cu lo kier den un negosacion asina. Gobierno, diaranson 6 di september, a haya un contesta for di Hulanda riba e propuesta aki na unda cu Hulanda a indica di ta dispuesto pa sigui papia riba e tema di solucion hibride. Deliberacionnan riba esaki lo continua den e temponan nos dilanti pa propone kico ta bay den un Ley di Reino y kico ta bay den un Ley Local.

            Mirando cu dia 10 di october proximo e debenan ta bay madura, ta preparando e documentonan pa fiansa riba interes halto di mercado pa paga bek den 20 aña pero cu un clausula cu por tuma den consideracion cu si Gobierno di Aruba yega na un entendimento di gobierno pa gobierno prome cu fin di aña, lo ta dispuesto pa baha e interes ainda.

            “Nos por bisa cu e prome paso ta tuma na unda cu Hulanda a acepta pa habri combersacionnan riba e solucion hibrido cu Gobierno di Aruba a propone. Esaki ta un desaroyo positivo. Pa esaki, Gobierno di Aruba a haya te cu fin di aña 2023 pa yega na un acuerdo. Gabinete Wever-Croes ta sigui na mesa cu Hulanda cu e mesun determinacion y cu hopi positivismo pa yega na solucion den beneficio di Pais Aruba”, Prome Minister a enfatisa.

            Den e reunion den Parlamento, Prome Minister a duna e resumen aki y a trece tur documentacion pa pone nan ter inzage. Parlamentarionan asina por wak y lesa tur e cartanan aki. “Akinan tin transparencia, no tin nada di sconde y lo no sconde nada tampoco pasobra ta hunto nos mester yega na e miho solucion pa nos pueblo, sperando cu Parlamento duna Gobierno e sosten pa sigui negocia cu Hulanda pa yega na e miho areglo den benificio pa henter pueblo di Aruba”, Prome Minister Evelyn Wever-Croes a duna di conoce.