DEN HAAG: E siman aki, Tweede Kamer na Hulanda a instala un asina yama ‘Tijdelijke Commissie Corona’.
E comision aki ta bay traha riba un proposicion pa prepara ampliamente henter un Encuesta Parlamentario encuanto e Crisis di Coronavirus na Hulanda.
Tabata siman pasa cu Tweede Kamer a vota pro pa lanta e Comision temporal aki. Nan ta bay traha pa prepara e Encuesta, cu tin di haber cu tur sucedido, e maneho, e escogencianan, y medidanan tuma durante e Crisis di Coronavirus.
Pesey e Comision lo bay traha pa bin cu detayenan concreto. Lo bay check e.o. cual tema por wordo investiga. Aki ta bay check por ehemplo e suministro di informacion na Tweede Kamer, e relacion entre Tweede Kamer y Gobierno, con nan a lanta e Organizacion di Crisis, e rol di Tweede Kamer, con a anda cu Constitucion y e base huridico pa cu e medidanan tuma durante e Crisis.
President di e Comision a bira Khadija Arib (PvdA). Vice-Presidente a bira Olysse Ellian (VVD).
Esnan cu a bira miembro di e comision ta Marijke van Beukering-Huijbregts (D’66), Vicky Maeijer (PVV), Hilda Palland (CDA), Pepijn van Houwelingen (FvD), Nicki Pouw-Verweij (JA21), Wybren van Haga (Groep van Haga), y Pieter Omtzigt (Lid Omtzigt).
