Ainda Hues no ta dicidi den caso Gobierno contra SEPPA y SIMAR
ORANJESTAD (AAN): Diaranson mainta Hues di Corte di Husticia, a tuma un decision intermedio den e caso sumario cu Gobierno a cuminsa contra sindicatonan SIMAR y SEPPA. Gobierno a cuminsa e caso sumario, pa cu e accion cu e sindicatonan kier a tuma, cu ta reduci orario di trabou pa cu e 12.6 % di reduccion di salario cu Gobierno kier introduci.
Luna pasa 11 Februari 2022, pa oranan largo tratamento di e caso a tuma lugar y a keda palabra cu ayera Hues a keda di duna sentencia. A resulta cu Hues a tuma un decision intermedio. E kier haya mas informacion pa asina por tuma un decision.
BAHA GASTO DI GOBIERNO
Hues den su evaluacion di e caso ta mustra cu durante tratamento di e caso, el a haci preguntanan y a keda constata cu Hulanda kier pa Gobierno baha gasto di personal. Hulanda kier un solucion structural. Por a compronde cu Hulanda y Gobierno di Aruba a yega na palabracion pa bin cu medida pa baha e gastonan grandi di personal di Gobierno.
VIOLACION DI DERECHO DI PROPIEDAD
Hues a mustra cu SEPPA y SIMAR a mustra cu e medida di 12.6 % riba salario, a base di articulo 19 di e Promer Protocol di EVRM di Staatsregeling di Aruba, ta un violacion di derecho di propiedad. Gobierno a reconoce esaki.
MESTER BAHA GASTO
Hues durante tratamento di e caso, a intercambia di pensamento cu Werleman di Finanzas, caminda entre otro a papia riba introduci VUT pa asina baha e personal di Gobierno. Di parti di Gobierno a wordo mustra cu no por bin cu medida asina liher. Hues den su evaluacion ta mustra cu e 12.6% ta un medida temporal cu tabata planea pa 6 luna pero te ainda ta vigente.
Hues ta haya cu for di 2 aña pasa, Gobierno mester a cuminsa cu alternativanan structural pa baha e gasto di Gobierno, cual no a sosode.
MESTER PRESENTA SOLUCION STRUCTURAL
Hues a bisa cu e kier pa Gobierno presenta un plan structural y no temporal na Hulanda, con ta bay baha e gastonan di personal di Gobierno. Hues kier mira solucion structural y no temporal pa reemplaza e 12.6 % cu Gobierno a keda mantene.
Hues a mustra cu sindicatonan SEPPA y SIMAR a bisa durante tratamento di e caso, cu nan lo no bay den accion tanten cu no tin un sentencia. Hues ta kere cu sindicatonan lo mantene e palabracion aki.
DECISION DI HUES
Hues a ordena Gobierno pa dia 16 di Maart 2022 den Corte presenta e medidanan structural cu ta bay tuma. E sindicatonan SEPPA y SIMAR den Corte lo haya copia di esaki y nan lo tin 2 siman di tempo pa entrega nan reaccion riba esaki na Corte. Despues Hues lo laga sa, si el a haya suficiente informacion y ki dia lo por spera sentencia.
