ORANJESTAD (AAN): E siman aki ta cumpliendo 7 aña desde su gran apertura, e Hotel Riu Palace Antillas.
El a habri dia 11 di October 2014 bao direccion di Richard Velasco, y a conta cu un grupo selecto di trahador, supervisor di experiencia profesional amplio cu a bin di su hotel ruman Riu Palace Aruba, apart di esnan cu a wordo contrata pa bay traha eynan.
Na 2015 a ricibi un General Manager nobo Sr. Juan Blanco, kende a duna e Hotel un imagen nobo hopi positivo, aportando tur su conocimentonan encuanto hoteleria cu el a obtene na su pais Spaña, pais number 1 den mercado turistico mundial, y kende prome cu esey a maneha algun di e 101 hotelnan cu e cadena Riu tin rond mundo.
E resultadonan na Aruba a bira visible mesora, y a resulta exitoso. Ainda ta corda con e gerente general nobo Juan Blanco, den apenas 4 dia na Aruba a siña e nomber di e mas di 800 empleado di e dos hotelnan Riu na Aruba.
Algo fabuloso cu bale la pena menciona, ta cu ora cu a habri mercado turistico bek despues di cierre di pandemia, Juan Blanco a habri e hotel na 2020 cu tur protocol y medidanan sanitario y ya na Januari 2021 el a wordo promociona pa e funcion di Delegado General di cadena di Hotel Riu pa henter continente di America. E funcion ey tabata wordo ocupa anteriormente door di Sr. Danielle Camponovo, un ciudadano Suizo kende cu su bishitanan habitual pa Aruba a gana e aprecio y cariño di e personal di hotel.
Juan Blanco a mantene excelente relacion cu Gobiernonan di Aruba, manera cu un homber di negoshi mester haci, y asina el a wordo bon reconoci den mundo politico.
Meymey di Januari 2021 a yega Luis Fuentes pa tuma e puesto di General Manager. Procedente di Panama, y no obstante e dificultadnan cu e pandemia a trece cune, toch Fuentes a logra hiba un bon maneho di tur e situacion aki.
Luis Fuentes tin un staf excelente di Assistant Managers, manera Tristan Nerderlof, Danny Nieto, Alejandro Rigo, e chef ehecutivo David, director di entretenimento Randy Ray Hernandez, Alfonso, y su supervisornan Angela Haydeé, y un Hotel Team hopi profesional cu ta hiba Luis Fuentes y Hotel Riu Palace Antillas pa e caminda di progreso.
DIARIO a haya sa, cu entre e empleadonan cu a cuminza cu e Hotel for di dia di su apertura na 2014, tin esnan cu ta den staf di Frontdesk, manera Jaquelina Kelly, Roshelle Caberos, Marcos Henriquez, y e ‘tata’ Jean Bernard Jolys, y tambe hopi cerca na frontdesk e pianista Gerardo Sanson cu ta ricibi cu musica suave e huespednan cu ta check-in, despues di un viahe largo y cu tur ta sigui duna e mihor bon bini na e bishitantenan.
Hotel Riu Palace Antillas ta conoci pa su famoso atencion personaliza, cu ta motibo di comentario duna tur dia pa e huespednan cu ta admira e gran famia cariñoso cu e staf di Hotel ta ofrece.
Esnan cu ta pasando banda di e Hotel e dianan aki por nota cu e Hotel ta pasando den un proceso di renobacion y esaki lo tin di keda cla pa luna di December, y pa asina habri un temporada nobo cu cambernan nobo cu e ultimo tecnologia aden pa servicio na huespednan.
DIARIO ta felicita tur esnan di Hotel Riu Palace Antillas cu nan di siete aniversario.
