Hospital di Aruba celebrando momento historico cu sistema electronico nobo di pashent

Optimalizacion di procesonan di data y cuido

• Henter Hospital awor riba sistema HiX 

ORANJETSAD (AAN): Diabierna merdia, pa exactamente 12:00 pm, tabata un gran momento di celebracion na Horacio Oduber Hospital (HOH) unda cu a bay LIVE cu e sistema electronico nobo di pashent.

   Durante un ceremonia oficial den presencia di Minister President Mike Eman, Minister di Salubridad Publico, Asunto Social y Cuido di Adulto Mayor Mervin Wyatt-Ras, Hunta di Directiva, Hunta di Supervision y management di HOH, directiva di ChipSoft, director di Setar N.V., Furore, UO AZV, Vincent Storimans di VNO y un grupo hopi grandi di coleganan di HOH a tene den forma festivo un ‘countdown’ y pa exactamente 12or a bay LIVE cu e sistema nobo.

   Un momento masha importante cu ta marca un etapa nobo den cuido na Aruba den loke ta optimalisa procesonan di data y cuido dentro di HOH. E sistema nobo aki ta un paso grandi den eleva eficiencia operacional y tambe mehora calidad di cuido.

   Na januari 2025 a firma contract cu e compania Hulandes Chipsoft pa nan programa electronico di pashent cu ta hiba e nomber di HiX. Pa implementa y haci e transicion pa e plataforma nobo aki a rekeri durante mas di un aña un planning preciso, preparacionnan extenso, training intensivo y esfuerso di cada empleado di HOH, sea cu ta traha directamente of indirectamente cu e sistema aki.

   Cu implementacion di HiX, HOH ta tuma un paso grandi pa un plataforma integral cu ta garantisa uniformidad y standardisacion den e procesonan di cuido. Tambe lo ofrece entre otro bentahanan manera un miho documentacion y registracion y cuido basa riba data. Esakinan lo conduci na mehora eficiencia y siguridad pa un sosten optimal di cuido y mas atencion na pashent.

   Durante e ceremonia prome cu a bay “LIVE” Presidente di Hunta di directiva, Jacco Vroegop, a duna di conoce cu e proyecto aki a inicia caba na aña 2024 unda cu a cuminsa cu un programa interno na HOH cu ta hiba e nomber di ‘ARISE’ (ARuba Integrated healthcare SystEms). E comision encarga a busca e miho ‘fit’ pa Hospital y Aruba pa loke ta un sistema completo y hunto cu expertonan di e agencia Furore di Hulanda a brinda asistencia durante ful e trayecto di e implementacion di HiX.

   Preparacion: Despues di un ‘kick off’ a tene varios training pa educa mas o menos 200 trahador cu ta forma parti di e team di e proyecto enorme aki. Nan ta encarga pa guia tur nos profesionalnan den cuido cu lo bay traha cu e sistema nobo aki.  Siguientemente a tuma luga e asina yama “inrichtingsweek” unda a hinca e “features” pa cada departamento cu lo uza e plataforma aki.

   Ta papia aki di e departamentonan di cuido pero tambe di e departamentonan di voeding, radiologia, finansa, bloedbank y mas pa un integracion completo. Coleganan a sigui despues cu curso di forma digital y tambe den forma personal. Na oktober 2025 a tene un dia specialmente pa test tur cos pa asina por sigui perfecciona e sistema nobo aki.

   Gregory Croeze, Miembro di Hunta di Directiva a conta cu hasta tabatin dia cu 25 “consultants” a bin for di Chipsoft y tambe di Furore pa duna training simultaneamente. Ademas, na 2025 tambe a firma cu Setar N.V. pa e compania local por host e datacenter pa informacion di pashent di un forma safe, sigur y semper accesibel. Esaki berdaderamente ta demostra e magnitud di e proyecto y e importancia pa garantisa progreso y exito durante e transicion pe sistema nobo.

   Un sistema integral: Directiva di HOH ta spera cu e introduccion di e sistema nobo aki aki lo motiva otro coleganan den sector di cuido manera dokternan di cas na Aruba pa haci uzo di dje y asina tin un bista completo di e salud di nan pashent.

Adicionalmente, e sistema di HiX ta brinda e pashent mes, pa medio di un portal di pashent, e opcion pa nan mes por mira nan informacion medico, mira afspraak, mira resultado y mas di HOH den nan plant’i man. Pues, tur informacion medico di HOH di e pashent lo ta disponibel 24/7 riba bo telefon of computer. Pronto lo duna tur e informacion con un pashent por activa y haya acceso na e portal aki. 

Pabien na cada persona cu a haci e momento historico aki un realidad. Un biaha mas team di HOH ta demostra nan curashi, profesionalismo, dedicacion y compromiso cu HOH, su pashentnan y Aruba. Alavez nos ta pidi pashentnan cu acudi na Hospital pa tene pasenshi y comprension durante e transicion pa e sistema nobo aki. Pa HOH ta importante pa sigui desaroya y innova pa brinda tur pashent un miho cuido y un cuido accessibel.