Hospital di Aruba a bira prome den Caribe Hulandes pa haci operacion di higra cu aparato nobo Sonopet

Esaki den cooperacion nobo cu UMC Utrecht

ORANJESTAD (AAN): E cooperacion entre Horacio Oduber Hospital (HOH) y Universitair Medisch Centrum na Utrecht (UMC Utrecht) a drenta na vigor oficialmente prome di januari. Den cuadro di esaki a bin cu un aparato specialmente pe specialisacion di neurocirugia pero cu tambe por worde uza pa cirugia di higra, esta un Sonopet di e compania Stryker.

   DIARIO a compronde cu Ciruhano Jan Ringers tin 10 luna caba trahando na Hospital y ta custumbra cu e aparato Sonopet caba na Hulanda. Pues, ora cu tabatin un pashent pendiente pa bay afo pa kita tumor di higra el a bisa cu esaki no ta necesario ya cu a caba di haya e aparato aki na HOH. Dokter Ringers hunto cu e team di OK a haci e operacion na HOH mes cu a resulta uno exitoso y loke ta haci’e momento aki mas special ainda ta cu te prome pa Caribe Hulandes.

   Ciruhano Yuri Casseres, cirugano y medisch manager na HOH ta conta cu awe ta un dia importante pa Hospital pasobra no mester a manda un pashent afo. Danki ne cooperacion cu Hospital tin cu UMC Utrecht pa loke ta neurocirugia a obtene e aparato aki. E aparato ta originalmente destina pa e neurociruhano haci operacionnan di cerebro. Pero e ciruhanonan general tambe por haci uzo di esaki cu ta haci e aparato aki uno hopi diverso. Danki na Ringers cu ta un ciruhano specialisa den higra y pancreas awe a logra otro paso pa dilanti pa Hospital. Ringers tin experiencia caba pe operacionnan aki, hasta pa transplante di higra. Hospital lo continua haci mas operacion uzando e sonopet cu dokter Ringers, e neurociruhanonan y ful e team di Sala di Operacion.

   Ta hopi contento cu a logra esaki ya cu sigur e lo ta na beneficio di e pashent si por duna e pashent cuido aki mes y e por recupera despues trankil na cas hunto cu su sernan keri.

   Dokter Ringers ta conta cu e tabata bin Aruba caba como waarnemer y awo cu e ta vast, e ta hopi contento cu Hospital a logra haya e aparato aki pa asina e por haci hopi otro operacion na Aruba mes y pues no mester manda pashent afo. Ora e gastroenterologo a atende e pashent y a mira tur indicacion cu tin mester un operacion pa kita tumor a prepara pe pashent bay afo.  Ringers no a haya cu esaki tabata necesario mas mirando cu a caba di haya e aparato Sonopet y cu e mes ta haci e operacion aki pa trinta aña caba pues awo tin experticio na Aruba mes pa opera y kita tumor.

Ela comenta cu e operacion a bay perfecto. “Pa e operacion aki a haci uzo di diferente aparato cu nan tin caba y tambe e aparato nobo aki, esta e Sonopet.  E aparato ta traha cu’n sistema ultrasoon cual ta duna pulsonan (trilmento) y door di controla esakinan por corta y elimina pida di weefsel hopi preciso den e higra. Esaki ta minimalisa daño na higra y tambe limita perdemento di sanger. Pe motibo aki e pashent tambe tin un admision mas cortico y e recuperacion ta mas lihe.” Pues, di e manera aki Ringers a logra kita tumor for di e higra di e pashent. 

   Director di Hospital, Jacco Vroegop, ta conta cu e aparato aki ta yuda den diferente operacion grandi y cu danki na AZV y e cooperacion entre HOH cu UMC Utrecht a logra adkiri e aparato aki. E cooperacion cu UMC Utrecht ya caba a duna su fruto comienso di e luna aki y awe atrobe y lo sigui amplia mas ainda durante e proximo tempo. Esaki ta contribui grandemente na cuido medico di Aruba y lo trece mas oportunidadnan pa servicio na beneficio di nos pashentnan. Ademas, ta demostra e dedicacion di HOH pa cu su pashentnan y su compromiso na salud publico di Aruba pero tambe ne region di Caribe Hulandes.