E lo bira esun mas pio cu a dal e isla
- E lo pasa riba e isla como Categoria 4 of 5
ORANJSTAD (AAN): Manera tabata riba e pronostico, Diasabra den dia e bientonan rond di centro di Tormenta Tropical Melissa a sobrepasa e velocidad di 119 km/h, y asina oficialmente el a comberti su mes den Horcan Melissa.
E momento ey e tabata relativamente casi na mesun lugar di casi tur dia siman pasa. Melissa a wordo describi como un ciclon eratico, cu tabata manera parkeer den e area ey di lama entre Aruba y Jamaica, y dado momento riba Diabierna a hasta bira cuminza bin bek rumbo pa islanan ABC.
Pero Diasabra e tabata moviendo bek direccion Noordwest, y a bira Horcan di Categoria 1. Sinembargo e energia riba Lama Caribe combina cu e cobertura amplio di tur nubianan acompañando e area, fuera e presion abao di su wowo, a pone cu rapidamente el a escala y Diadomingo mainta ya caba e tabata uno di Categoria 4, pues e bientonan a sobrepasa 209 km/h.
Awe Dialuna e pronostico ta cu e wowo di Horcan lo cuminza bira bay direccion panort, despues Noordoost y pa Diamars marduga e lo yega costa di Jamaica. E peor ta cu e Horcan lo ta moviendo asina poco-poco, cu ta mira cu e lo bay keda 12 ora of mas ta azotando e isla, prome cu e wowo bandona e costa banda panort riba Diamars atardi.
Horcan Melissa lo bay ta e pio Horcan den historia cu ta bay dal Jamaica directamente. E lo bay ta peor cu Horcan Gilbert y Horcan Beryl, pasobra esun aki ta hopi poderoso. Loke tin tur hende preocupa ta cu e wowo di e Horcan awor ta claramente visibel via satelite, indicando asina ta con poderoso e ta. Pero pa algun dia caba e isla ta hayando awacero torencial, y awor varios banchi di awacero a cuminza dal e isla desde Diadomingo marduga caba.
Ora cu e wowo subi tera na Jamaica, e lo bay ocasiona destruccion na tur cas, edificio, brug, y careteranan cu no ta hopi bon construi cu refuerzo. Lo bay tin centenares pa miles di cas sin dak despues cu e Horcan poderoso aki pasa riba Jamaica.
Horcan Melissa lo bay ocasiona blackout na diferente parokia na Jamaica, y e grid di coriente lo keda destrui y e ora ey pa e proximo simannan, kizas hasta algun luna, hopi cas y negoshi lo bay ta sin electricidad.
Jamaica tin hopi sero, y e temor grandi ta cu lo bay tin hopi deslizamento di lodo, hasta den areanan unda nunca antes esaki a yega di socede. Daño lo ta inmenso na algun comunidad, cu lo bay keda isola debi cu caretera y brugnan ta keda destrui.
Horcan eratico: Melissa ta moviendo poco-poco mes, y ta sigui bira mas grandi danki na e lama cayente di e area ey di Caribe. Esaki ta preocupante pa autoridadnan na Jamaica, como cu esaki nifica cu pa oranan largo e habitantenan lo keda sufri di bientonan poderoso, awacero torencial sin stop, y casi ningun personal di rescate den e oranan ey lo no tribi subi caya pa bay duna yudansa. Pues lo bay ta 12 ora of mas di habitantenan tin di cuida nan mes.
Companianan di Utilidad di Jamaica riba Diadomingo mainta a duna un conferencia di prensa urgente, y e compania di electricidad JPS a indica cu nan a firma contract cu diferente compania den exterior, y nan a manda diferente Lineworker caba pa e isla, cu lo yuda nan traha mesora na final di horcan, pa purba restablece e grid di coriente di sector pa sector na un forma mas rapido. Ya caba nan tin 71 extra Lineworker cu a yega Jamaica, y di e forma ey e forza laboral di JPS a crece cu 30% pa haci trabao riba wayanan di coriente. Tambe nan tin un team cu ta bay analiza tur daño pa asina tuma decision, con ta pone prioridad riba ki sector lo haci reparacion prome.
Gobierno di Jamaica desde 3 dia pasa a duna ordo pa henter area di Port Royal evacua di e zona. E tabata un waf di Siglo 17 na Jamaica cu a wordo destrui door di un temblor na 1692, cu a pone 2/3 parti di dje sink den lama. Awendia e ta un pueblo historico y un sitio UNESCO World Heritage.
Gobierno ta bisa su habitantenan, cu si nan ta biba den areanan na costa hopi abao, of cerca di rieu, of den areanan cu durante Horcan Beryl tambe a keda inunda, pa nan evacua awo di eynan pasobra tur e zonanan aki lo bay keda peor bao di awa cu Melissa.
Mientras tanto Jamaica ta bao di un Hurricane Warning. Hurricane Warning tambe valido pa provincianan Cubano di Granma, Santiago de Cuba, Guantanamo, y Holguin.
Hurricane Watch ta valido pa peninsula zuidwest di Haiti, for di e frontera di Republica Dominicana te na Port-au-Prince.
E centro di Horcan Melissa riba Diadomingo atardi 5:00 pm tabata na 16.4º Nort y 77.2º West. Esaki ta como 185 km Zuid-Zuidwest di Kingston (Jamaica). Su biento maximo sosteni ta di 230 km/h, pues Categoria 4. E ta moviendo west poco-poco cu 7 km/h.
National Hurricane Center ta calcula cu awe Dialuna e lo cuminza move direccion Noordoost y tambe Nort. Nan ta calcula cu e lo cruza Jamaica riba Diamars marduga, cruza Cuba riba Diamars anochi, y ta riba zuidoost di Bahamas riba Diaranson.
