Monique Giel-Labad:
ORANJESTAD (AAN): Monique Giel-Labad, finalizando su entrevista cu Matutino DIARIO a menciona cu ora e hobennan ta den e ultimo klasnan di scol, ta dificil pa duna nan e guia tocante sexualidad.
Esaki pasobra ya caba nan ta activo y na ta bisa cu nan sa caba of cu nan no ta worry mas, pasobra nan no tin solucion pa nan bida of pa nan situacion.
Esaki ta un parti unda salud mental ta importante, pasobra nan a haya un par di hoben cu a duna indicacion cu nan kier a haci “self moord”. (Punto extremo di comete suicidio)
“Pues e parti ey ta un punto di atencion pasobra ora nos ta duna e charla aki, nos no ta duna e charla so. Pero nos ta wak full e klas, nos ta observa e comportacion di e muchanan y di eynan mi por saca afo si un mucha ta activo, si e mucha caba tin un problema, e ora ey mi ta referi esaki na e docente pa sigui duna e guia”, Monique Giel-Labad a comenta.
“Mayoria di docente ta prepara caba pa e casonan aki, nan tin informacion caba riba dje, y si nan falta informacion nan ta puntra bo”, el a agrega.
Monique a indica cu na final semper e ta traha un raport y eyden e ta duna su conclusion, y sugerencia kico nan tin cu pone atencion riba dje.
Monique a señala cu prome ora tabata papia di problema social tabata e situacion financiero, esaki tabata e problema mas grandi 15 aña pasa, pero aworaki problema social a bira asina varia, cu tin diferente factor cu ta pone cu e bida di e mucha ta hopi mas complica.
