Horcan Erin a suta St. Maarten cu hopi biento y olanan bruto

ORANJESTAD (AAN): Horcan Erin tabata Diabierna atardi 5:00 pm apenas uno di Categoria 1. 

El a escala asina rapido, cu ni 12 ora despues, esta Diasabra mainta pa 5:00 am ya caba el a yega na Categoria 4.

   Algun ora despues, e tabata yegando e nivel di Categoria 5, y despues atardi a logra esey tambe.

   Diasabra atardi pa anochi el a pasa panort di isla di St. Maarten, y a azota e isla cu hopi biento, lama bruto, y yobida fuerte algun rato.

   Pero e embergadura di Horcan no a wordo sinti na e isla.  Esey ta danki na e hecho cu e Horcan su wowo a pasa panort, pues e ora St. Maarten a sinti djis e pida suave di e mal tempo aki.  E movimento di Horcan Erin tabata rapido tambe.

   Mientras tanto ya caba Diasabra anochi pa 11:00 pm, St. Maarten a descontinua e Tropical Storm Watch, pero si a keda valido cu e alerta pa botonan chikito, y alerta pa inundacion.

   Horcan Erin a perde tiki forza, y Diadomingo atardi 5:00 pm e ta na Categoria 3.  Segun National Hurricane Center, e lo por bolbe haya forza ora cu e ta bay ta pasando pariba di Bahamas bay direccion nort.

    Awor bista di tur hende na St. Maarten ta dirigi mey-mey di Oceano Atlantico, unda tin un Disturbio #2 poco pabao di Islanan Cabo Verde, cu lo por bay ripiti un ruta similar di Horcan Erin den e siman aki pa weekend venidero.