For di Noord di Caribe el a alimenta su mes cu produccion Venezolano
*E presion di un horcan y e calor ta parti di efecto directo pa hende
*Proximo sistema a anuncia su mes pa Caribe pa fin di siman
ORANJESTAD(AAN)—E tercer weekend di Aruba, cu ta prepara pa regresa pa bida normal na final di vacacion di schoolnan e siman aki, sigur a exigi atencion pa e impacto directo di condicion di tempo ariba hende.
Un calor sofocante y insoportabel tabata e condicion basico di tempo cu a wordo ocasiona pa un horcan yama Erin, cu a cruza Oceano pa alcansa America.
Prome cu el a drenta Caribe pero a duna prueba cu tur advertencia pa e temporada 2025, mester wordo tuma cu seriedad.
Na un forma rapido, Erin a desaroya y bira un horcan sumamente peligroso di e categoria mas halto, pues categoria 5, mientras e tabata move den direccion pa Noord di e Islanan di Caribe, cu a bati alarma di Tormenta Tropical.
Alarma di tormenta tropical pa e parti Noord di region di Caribe, tabata directamente mara na e ruta pero tambe e tamaño di e horcan y e realidad di e forma cu e tabata alimenta su mes.
Contrario na loke hende ta pensa, e peliger di horcan no ta solamente caminda e parti central ta, pero den henter su mecanismo cu ta destrui e loke hende ta considera normalidad den tempo.
Pa e horcan sobrebibi e ta atrae e potencialnan den fondo di laman te den nubianan aleha for di su centro.
Den caso di Erin a papia di un horcan basta grandi pero cu “feeder band”cu cual e ta atrae su are di mal tempo. E rabonan di e horcan ta sumamente poderoso y ta carga cu potencial peligroso di un horcan.
Portretnan di tempo claramente tabata mustra con Erin tabata atrae su alimento cu su asina yama “feederbands”, rabonan cu ta atrae zonanan di mal tempo pa e sistema cu asina cada rato ta haya mas forsa.
Hopi biaha e peliger cu ta sconde den e bandanan aki ta wordo lubida pero nan ta partinan integral di e sistema, cu for di momento cu el a cruza Atlantico y tabata acera Caribe y America del Norte, a tira su rabonan y tabata alimenta su mes.
Erin a duna prueba tambe di e forma rapido cu e sistemanan ta cana na 2025 cu a entrega mundo prome cu e temporada realmente yega su culminacion, e peligernan grandi pa cual a wordo adverti.
Erin a cana cu rapidez pa den un oceano cayente, bira un super horcan.
Na e momento cu Erin tabata tabata na e asina yama “lengtegraad” pues den un linea cu Aruba, el a atrae e areanan di nubia den e Zona di Convergencia Intertropical den rabonan cu tabata colga te abou.
Na e momento cu Erin tabata Dialuna merdia 2 or na 23.5 North (Diez grado mas halto cu Aruba) pero na 71.1 grado West, pues casi mes longitud cu Aruba, Aruba a sinti e efecto di calor cu e tabata provoca.
Durante e anochi di Diadomingo, ya Erin tabata afecta e tempo na Aruba caminda e Zona di Convergencia Intertropical a wordo afecta y por a mira asina yama feederbands di Erin cruza ariba Aruba y alcansa teritorio Venezolano.
Erin a presenta Aruba sigur pa medio di cantidad di portret, un vista cla di loke temporada di horcan, ta representa den un situacion climatologico cu a cambia.
Sistema nobo bou vigilancia
E sistema nobo bou vigilancia ta un ola tropical riba e parti Oost di Oceano Atlantico.
E ta produci un cantidad limita di yobida desorganisa y mal tempo.
Manera tur indicacion ta awor, e por bira un depresion tropical na final di e siman aki.
E lo alcansa e region di Caribe mas abou cu tabata e caso di Erin y por bira pues e proximo sistema tropical pa cual lo bati alarma pa region di Caribe y sigur mas chens pa problema pa islanan parti Noord di e region.
Cuido di salud
For di un distancia hopi grandi Erin tabata tin un efecto enorme ariba tempo na Aruba cu condicionnan cu manera DIARIO a adverti na varios instancia, ta mishi cu e condicion fisico di hende pues ta afecta salud di hende.
Presion di sanger di hende ta importante y personanan cu tin un condicion medico cu presion, por sinti e efecto di sistemanan cu ta baha e presion di aire manera un horcan.
Aruba ta costumbra cu un presion di aire normal, cu ta agradabel pa e sistema di hende pa hala rosea. Ora presion di aire baha, hende ta sinti cansancio. Sigur personanan cu ehempel problema cu weso y musculo ta sinti e efecto di humedad halto y presion abou.
Personanan cu problema pa hala rosea tambe ta cay bou e grupo mescos cu sigur patientnan di curazon y pulmon.
Pues den e dianan mester tene cuenta cu situacionnan di tempo cu ta mishi cu e clima normal di Aruba, cu ta un fuente saludabel ariba su mes.
Un sistema di horcan ta basa riba e presion di aire cu ta baha.
Manera ya bisa mester tene cuenta cu e efectonan indirecto manera presion di aire, calor y humedad cu ta afecta hende pero tambe den e velocidad cu cual mal tempo por desaroya ariba Aruba tambe, manera a keda proba den fin di siman.
DIARIO lo sigui informa Aruba tambe ariba otro tereno indirectamente mara na tempo. Evita alcohol y demasiado ehercicio fisico, cansancio y cuminda cu tin efecto ariba curpa di hende.
Busca ambiente di trankilidad y tene cuenta cu e tempo cu awor un horcan ta tuma pa desaroya manera fin di siman a demostra.
