Horacio Oduber Hospital hopi satisfecho cu bishita di Prome Minister Hulandes

*Un punto discuti ta mihor acceso pa Aruba na mercado di medicina di Hulanda

ORANJESTAD (AAN): Despues cu Prome Minister di Hulanda Dick Schoof a bishita Horacio Oduber Hospital riba Dia di Mama, director di e hospital Jacco Vroegop a splica cu el a keda hopi contento cu e hecho cu e Prome mandatario a bishita hospital, mirando cu hopi biaha un Prome Minister no ta haci esaki.

“Prome Minister Schoof a mustra asina con importante nos hospital ta pa e region y tambe pa Hulanda”.

Nos a papia riba diferente topico, incluyendo nos vision, cu ta ‘accesible healthcare for everyone’, esta cuido di salud accesible pa tur hende y tambe nos lema, ‘nos semper tey’.

Semper nos di hospital ta cla pa yuda tur hende, sin wak kende bo ta of di unda bo ta bin, segun Vroegop.

E director a bisa tambe cu a papia cu Schoof riba personanan indocumenta y e obligacion di duna cuido.

Banda di esaki Vroegop a papia cu Schoof riba medicamento.

“Nos a papia riba con importante ta pa nos, como tambe Corsow y St. Maarten, haya acceso na e mercado di medicina di Hulanda”.

Ta importante pa nos haya acceso mas facil y mas rapido na medicina di Hulanda y na un prijs faborable.

Nos a papia tambe riba e importancia di personal, unda cu nos a toca e tema di educacion avanza pa enfermeronan y entrada di studiantenan na universidadnan pa studia medicina, segun e director di hospital.

El a bisa tambe cu a papia cu e Prome Minister di Hulanda riba opleiding pa specialistanan medico.

“Aruba mes no tin suficiente persona pa traha den cuido medico y pesey semper nos ta depende di hendenan di afo”.

Nos a pidi Hulanda pa ayudo, pa asina nos por atende y cumpli cu tur futuro reto cu nos enfrenta.

Esaki segun Vroegop, kende a indica cu tabata un bishita hopi placentero, unda cu tabata tin diferente pregunta di parti di Schoof, cu a wordo contesta hopi bon.

Segun e director di hospital, e ta sigur cu e Prome Minister Hulandes lo haci algo cu e informacion cu el a ricibi for di hospital y cu asina cuido medico di nos isla lo por probecha di esaki.