Inmigracion a yama e website como “falso”...
ORANJESTAD (AAN): Un compania cu ta estableci na Spaña y cu ta promove su mes como uno cu ta duna servicio pa yuda hende haya ‘visa’ pa ora di viaha pa cierto pais, a dicidi na cuminsa ofrece esaki na viaheronan cu kier bin Aruba y cu tin di yena e formulario digital yama ‘Online ED Card’.
Y nan a pone propaganda riba Google, di tal forma cu ora un turista bay haci un buskeda riba Google pa “Online ED Card Aruba”, nan propaganda ta sali prome, pues e resultado mas na halto cu e indicador “sponsored”.
Esun corecto mes, esta esun oficial di Aruba ta aparece na di 2ndo lugar di resultado di buskeda.
Y hopi turista ultimo temponan, envez di acudi na e website oficial di Aruba cu ta ‘edcardaruba.aw’... nan ta click riba esun sponsored cu ta bay na e website di Spaña registra como ‘embarcation-aruba.com’
Pa bo yena e ED Card pa Aruba, esey semper ta y lo keda como algo gratis pa haci. Bo ta yena e formulario digital aki riba edcardaruba.aw prome cu bo haci e vuelo, es mas e aerolineanan ta exigi pa mira si bo a haya OK y luz berde di Online ED Card, prome cu nan lagabo bay abordo. Semper e ta gratis.
Pero e turistanan cu ta bay riba esun sponsored di embarcation-aruba.com ta wordo sorprendi cu nan ta cobra e suma di $74 pa cada pasahero pa nan por haya e ED Card.
“E ta wordo considera como un ladronicia, un scam,” ta loke un experto local a indica na DIARIO den fin di siman. “Y nos tin indicacion cu varios turista a cay pa e trampa aki.”
Riba Diaranson, Inmigracion Aruba tambe a emiti un advertencia. Nan a hasta yama e website ey di ‘embarkation-aruba.com’ como uno falso. Nan ta adverti publico pa tene cuidao pa no drenta e website robez ora di bay yena e ED Card di Aruba, pasobra bo ta core riesgo di duna persona di baho mundo tur bo informacion personal, y kizas bo ta perde hopi placa.
Inmigracion Aruba ta adverti cu e website ‘falso’ ey ta cobrando pa Aruba su Online ED Card, siendo cu Aruba hamas ta cobrando pa esey.
