Sharine Croes-Dubero di Departamento di Enseñansa
- Finalmente un total di 272 ta bay studia na Hulanda
ORANJESTAD (AAN): E ultimo toquenan ta wordo haci preparando pa un biaha mas un grupo di becado bandona nan isla natal, rumbo pa estudionan mas avanza na Hulanda. Tin indicacion cu e biaha aki ta hopi hoben ta bayendo pa studia den exterior.
Sharine Croes-Dubero di Departamento di Enseñanza, a confirma den un entrevista cu e aña aki, en total nan a ricibi 550 peticion pa Studielening pa bay studia na Hulanda, Aruba, y otro paisnan. Semper ta conoci cu ora resultado di examen drenta, cu algun peticion ta cay afo, y na 2023 ta basta a retira nan peticion.
Finalmente, Arubalening a haye ta atende 461 peticion di studiantenan. Di esaki, 70 peticion ta pa keda studia na Aruba.
Pa bay studia internacionalmente, Arubalening a ricibi 391 peticion, di cual 272 ta pa bay studia na Hulanda, 16 pa Canada, 5 pa Curaçao, 1 pa Hungria, 1 pa Puerto Rico, y 1 pa Colombia. Tambe a drenta 21 peticion pa finaliza estudio di Master’s (16 pa Hulanda, 4 pa Merca, 1 pa Canada).
E prome grupo di becado ta saliendo pa Hulanda riba Diasabra 29 di Juli, y esaki ta pa 23 studiante, kendenan ta bayendo Maastricht, Tilburg, y Eindhoven.
E di dos grupo di becado ta sali pa Tera Frieu riba Diamars 1 di Augustus, y esaki ta un grupo di 113 studiante.
E otro studiantenan ta viahando riba nan mes, y sea nan a bay caba of ta viahando despues di e fecha di 1 di Augustus.
Corda entrega bo documento: Croes-Dubero ta haci un suplica na e 5 studiantenan local cu ainda no a entrega nan ‘Overeenkomst tot Geldlening”, y nan ‘Verklaring tot toekenning’. Esey ta dos documento cu Arubalening ta exigi pa ricibi, prome cu nan por paga e studiantenan aki. Pues ora cu nan caba di yena e documento, tin di bay entrega esaki fisicamente na Arubalening pa por haci nan pago.
E cinco studiantenan cu no a entrega e formularionan aki, ta poni pa bay riba vuelo di 1 di Augustus! Como cu nan a tarda pa entrega documento, e placa pues lo bay drenta riba nan cuenta te despues di e fecha ey.
Total riba e vuelonan pa Hulanda lo tin 137 studiante cu ta bay den e grupo organiza.
E siman aki ya e studiantenan na Aruba tabatin un cita cu Censo pa asina nan ‘schrijf uit’ for di Aruba. Tambe nan ta haci proceso similar pa indica na AZV cu nan ta bayendo den exterior.
Ora nan yega Hulanda, lo wordo ricibi door di Comision di Aruba Huis, y tambe e Comisionnan di POC di cada ciudad unda e studiantenan ta bay, cu tin un programa poni den otro pa yuda nan bay inscribi na Gemeente, como cu e biaha aki mayoria studiante ta saliendo y ta cla pa nan camber na Hulanda.
