Diego Acevedo di SISSTEM di Universidad a ripara
ORANJESTAD (AAN): Con e proyecto di SISSTEM na Universidad di Aruba a bay den ultimo aña escolar... tabata e pregunta cu DIARIO a haci na Diego Acevedo, kende ta orador di e asina yama ‘Sustainable Island Solutions through Science, Technology, Engineering and Mathematics.’
“E aña escolar cu a caba a bay hopi bon,” ta loke Acevedo a declara y a mustra cu a produci caba un grupo di graduado.
El a indica cu SISSTEM ta un di e programanan di mas jong na Universidad, pues nan ta sigui crece y nota hopi interes di studiantenan cu ta acercando nan. Tambe a mira con e recien graduadonan di SISSTEM a haci impacto riba e isla, y cu a cuminza traha den veld. E ta algo cu ta haci esnan tras di SISSTEM na Universidad di Aruba sinti nan mes orguyoso.
E proyecto di SISSTEM ta siña tur studiante cu pasa door di Universidad di Aruba, con e isla ta hinca den otro, e.o. e sistemanan tecnico cu tin, con e isla ta haya su energia, con ta haya awa, y kico ta haci cu desperdicio. Aki ta mezcla e sistemanan tecnico hunto cu e sistemanan natural.
Aki pues ta enfoca riba e ecosistemanan rond di Aruba, con por mantene Aruba na un forma sostenibel. Pues na un sistema dinamico ta uni sistemanan natural cu esnan tecnico, pa asina sigui bay dilanti cu e isla.
Dos programa: Aworaki e proyecto di SISSTEM na Aruba tin dos programa, esta programa di Bachelors y un Masters, anto den e Bachelors nan ta mas tanto dirigi riba studiantenan cu a studia VWO, a studia HAVO cu ‘exact paket’, pues cu nan tin interes den ciencia, nan tin interes den matematica, natuurkunde, scheikunde. Anto e studiante nan aki ta haya esaki hopi interesante.
Na Aruba ta mirando claramente cu tin hopi interes di studiantenan cu kier bay den direccion di Engineering and Technology, como tambe Data-Science, y Information Technology ta birando hopi interesante. Tin otro grupo di studiante, kendenan gusta hopi e parti biologico, esta e ‘Bio-Environmental Sciences’.
Tambe nan tin e programa di Masters, y ta nota cu esnan cu a gradua den Bachelors, cu ta sigui pa Masters. Pero tin studiante cu ta trahando den veld, cu ta ingeniero y trahando den sistemanan tecnico, y kier bin Universidad di Aruba pa sigui cu nan educacion den direccion tecnico aki.
Studiantenan local briyando: E programa di SISSTEM ta destina pa e studiantenan aki por sigui traha na Aruba despues, pues nan ta compronde bon con e sistemanan di Aruba ta hinca den otro, y esey ta duna nan un bentaha riba cualkier experto cu yega aki for di exterior. E studiantenan local sa kico nos ecosistema ta, nan sa con e problemanan ta, riba tereno di ingenieria. Nan sa cu na Aruba material ta deteriora mas rapido, debi na constante solo, e nivel halto di salpeter, cu no ta djis algo dificil pa deal cu ne, pero expertonan cu yega di exterior nan no ta ripara esey mes di biaha.
Segun Acevedo, e studiantenan di Aruba si sa con pa deal cu e problemanan aki. Diferente compania ta acercando SISSTEM y Universidad di Aruba pa check si nan por tin studiante cu por yuda nan cu cierto retonan cu nan ta confrontando, y asina ta purba traha cu nan, y manda studiantenan pa resolve dificultadnan.
Tambe den sector di Horeca, tin Hotelnan cu tin mester di hende cu por compronde e sostenibilidad, cu por compronde sistemanan tecnico, cu por deal cu e circunstancia, y nan ta cuminza haya un posibilidad pa trabao eynan.
