Carolina Thiel-Span di Fundacion Autismo Aruba:
ORANJESTAD (AAN): E acceso creciente na informacion tocante autismo ta trece mas conscientisacion y ta yuda mayornan y educadornan reconoce señalnan y busca orientacion profesional mas trempan. E desaroyo aki ta presenta un reto pa nos comunidad: adapta nos infrastructura y sistemanan pa atende e necesidadnan cu ta bira mas visibel.
Durante un entrevista, Carolina Thiel-Span di Fundacion Autismo Aruba (FAA) a splica cu e acceso na conocemento a crece rapidamente, entre otro danki na internet. Sinembargo, segun Thiel-Span, nos sistemanan y infrastructura no a desaroya na e mesun ritmo pa ofrece e sosten necesario.
Mas informacion ta facilita cu mayornan y maestronan busca ayudo profesional y cu muchanan por yega na un diagnostico mas trempan. Esaki ta haci e necesidad di yudansa y sosten den klas cada biaha mas evidente.
Thiel-Span a enfatisa cu nos no por sigui prepara nos sistemanan na e mesun ritmo di antes. Den enseñansa, e punto di salida mester ta cu lo tin muchanan cu diferente necesidadnan den klas, y cu e preparacion pa atende nan mester ta parti integral di e sistema.
Esaki ta inclui brinda educadornan e conocemento, hermentnan y sosten necesario, y percura pa e sistema completo rond di e mucha funciona di manera coordina.
E yamada ta pa un preparacion conhunto y consciente di nos comunidad, pa cu cada mucha por haya e ayudo y oportunidadnan cu e mester pa desaroya su potencial.
