E remedinan ta un necesidad y no un luho:
*AZV no ta paga pa remedinan cu ta necesario
ORANJESTAD (AAN) – Hopi hoben den nan adolescencia ta haya problema di dermatitis, cu ta un iritacion den cuero di curpa y cara y cu ta presenta den diferente forma.
Tin hobennan cu ta sufri di esaki for di chikito caba, na un forma cronico, y cada bes mester uza cierto sorto di crema pa alivia e sintomanan, manera cuero seco, peishi, cambio di color den e cuero y tin biaha peishinan cu si no trata nan na tempo, ta bira grandi y incomodo pa e hoben, cu incluso tin cu no kier ni bay scol pasobra nan ta haya bullying, tin biaha hasta cruel.
For di momento cu AZV a considera cu remedi pa cuero ta un luho, y pa no cubri mas e crema y remedinan aki (cu por inclui hasta pildo), cu mester di receta pa por adkiri nan, hopi hoben tin cu sufri. Hopi mayor ta haya nan mes limita pasobra nan ta costoso, e placa no ta yega pa cada dos of tres luna cumpra e remedi, y e mucha/hoben mester sufri masha hopi mes pasobra nada nan no por haci.
Esaki ta un situacion cu no ta acopla su mes na un parti di e Derechonan Universal di Mucha, cual cuido medico y haya remedi pa nan salud, ta un di e derechonan remarcabel.
Otro situacion ta cu cada bez cu e mucha/hoben mester di mesun crema-remedi, mester bay cerca e docter pa haya un receta. Botica ta keda cu e recetanan aki pa nan archivo, kiermen e recetanan for di esun prome y tur cu ta sigui, no ta conta pa “remedi conoci”. Y cada bez cu bay dokter (specialista) e ta cobra pa e receta. Cerca dokter di cas no por pidi e receta pasobra e no ta tratando e malesa ey, sino un dokter specialisa.
Esaki ta un keho cu varios mayor tin pa cu e sistema di AZV, y su limitacion di remedi y nan ta considera esaki como algo, simplemente “inhumano”, y cu ta bay contra e dignidad di e hoben pashent.
Mas ainda, e temponan aki cu e clima di calor excesivo cu e poblacion a, y ta sufri di dje ainda, e situacion ta bira peor, y incluso desesperante pa e mucha/hoben cu no por controla su curpa sin e remedi rekeri. Pero asina e sistema di AZV ta, y no tin manera pa bin cu cambio y no tur mayor por hiba su yiu pa busca su salud di cuero, den exterior!
