Hefe di Registro Civil y Censo a confirma!
- Hopi cita ‘ficticio’ a ser haci riba nan website
- Hende ta pidi cita sin cu nan tin documento mes ainda
ORANJESTAD (AAN): Riba Diahuebs, Hefe di Registro Civil y Censo a anuncia cu ta confrontando cierto problema pa esnan cu kier sea inscribi of re-inscribi den Registro di Poblacion. Hopi hende ta keha cu ora nan bay pa inscribi, aworaki na Augustus e proximo fecha disponibel pa un cita, ta te na luna di October 2025.
A ser splica cu e peticionnan pa (re-)inscribi den Registro di poblacion a conoce un subida drastico. Pa e producto aki Censo a yega su capacidad maximo.
Ademas di e subida drastico e siguiente factornan ta causa un problema, perhudicando otro clientenan di haya un cita: (*) Clientenan cu NO tin nan permiso y/of otro documentonan na ordo ainda ta blokia citanan y NO ta cancela esaki. (*) Clientenan cu a wordo inscribi caba (por ehemplo via digital loket) NO ta cancela nan cita. (*) Diferente otro persona, consultancy etc. ta haci cita pa cliente ficticio.
Censo lo keda haci su maximo esfuerso pa controla esakinan y anula esaki di e lista di cita, pa asina por habri cita pa clientenan cu si por of mester inscribi. E ta costa Censo trabaonan innecesario pa motibo di conductanan indesea.
Suplica na pueblo: Pa es motibo ta pidi cooperacion pa lo siguiente:
(*) NO haci cita te ora bo permiso ta cla y bo documentonan ta na ordo.
(*) Cancela bo cita na tempo si acaso bo a keda cla cu bo inscripcion. Bo por cancela bo cita via e link cu bo a haya dia bo a haci e cita.
E tardanza aki tin varios yiu di tera perhudica y cu miedo cu si acaso nan bira malo pa kico cu ta, nan no ta cubri pa AZV como cu nan tin di warda 2 luna prome cu nan inscribi.
Ta di spera cu Censo por soluciona e obstaculonan aki pa asina nan regresa na e sistema di semper bek.
