Conmemorando Dia Internacional di e Pueblonan Indigena
ORANJESTAD (AAN): Linguista Ramon Todd Dandare a duna di conoce cu diasabra 9 di augustus UNESCO a proclam’e Dia Internacional di e Pueblonan Indigena. E pueblonan indigena ta e pueblonan cu t’ey for di hopi siglo caba na un luga.
Si Aruba tabatin ainda e Caiquetionan, por a bisa cu esey ta e grupo indigena di Aruba. Nan tabata na Aruba, Boneiro, Corsou y tambe parti di Venezuela y Colombia. Pero e Caiquetionan a disparce, a extingui y lamentablemente e lenga Caiquetio tambe ta extinto, Todd Dandare a indica.
Caiquetio tabata un lenga Arawak y como lenga Arawak e tabata hopi parecido na Wayuunaiki cu ta e lenga di Guajira, Colombia.
Tocante esaki Ramon Todd Dandare ta bay papia y e lenganan indigena di e region. Lo papia di lenganan indigena rond mundo y pakico UNESCO ta boga pa reserva e lenganan aki, pa nan no muri, pa nan no bay perdi ya cu pa medio di lenga tambe ta preserva cultura, historia y bida.
Diasabra awor na Biblioteca Nacional na Playa tur hende ta invita pa ta presente 4’or di atardi pa papia tocante e lenganan indigena.
E linguista a sigui bisa cu e lenganan indigena tin na e continente Americano. Prome cu e Europeonan a yega y door di nan binimento hopi di e lenganan indigena a bay perdi.
El a menciona cu na America Central tin Honduras, Nicaragua, Belice y Guatemala, eynan ta papia un lenga cu yama Kalinago y e ta un lenga hopi interesante pasobra e ta un lenga Arawak, pero esnan cu ta papi’e ta hende color scur. Riba tur esaki Ramon Todd Dandare ta bay papia di dje diasabra awor.
E importancia di dia 9 di augustus ta pasobra na aña 1992 UNESCO tabatin un reunion grandi caminda a dicidi cu mester preserva e lenganan indigena di mundo. Tin rond di 90 pais na mundo caminda tin lenga indigena ta existi. Esun mas cerca di Aruba ta di Venezuela y Colombia y esun mas cerca di Colombia ta e lenga Wayuunaiki (Guajiro).
E atardi aki ta bay ta hopi interesante pa asina conoce un tiki mas di e historia. “Lamentablemente nos tin un sistema di enseňansa cu loke ta di nos mes nan no ta siña nos. Nos no a siña nada tocante nos antecesornan (...) P’esey ta sigui pusha pa pueblo conoce su historia berdadero”, el a agrega.
E charla aki ta organisa door di Fundacion Lanta Papiamento y Stichting Rancho cu sosten di Biblioteca Nacional.
