Hopi hende sumamente interesa den e charlanan den bario tocante reglanan di trafico

Thomas Ruiz, di VRA:

*Tin hende ta keda sorprendi pa tur loke nan no tabata sa! 

ORANJESTAD (AAN) – Manera Thomas Ruiz, Presidente di Vereniging Rijscholen Aruba (VRA) a yega di bisa anteriormente, den un entrevista reciente cu DIARIO, el a reitera cu VRA a dicidi di bay den barionan mirando cu instancianan di e ministerio concerni cu transporte publico no ta haci nada ni ta duna VRA oido.

            E ciudadanonan cu ta acudiendo na e charlanan informativo di VRA ta keda babuca, ora nan ta scucha e informacion corecto tocante e leynan cu a cambia.

            “Di casualidad mi a cuminza ripara awo tambe, cu hopi hende ta cambia nan transporte di auto pa un bicicleta of un bromer electrico. Pues bo ta wak e cambionan pero nan no sa con e ley ta hinca den otro.

Nos awo cu a dicidi di drenta bario pa bario ta bay educa e ciudadanonan, siña nan ki leynan a cambia y pa tene cuenta cu nan. Mas tanto e ‘hot item’ ta e rotondenan, e regla di peaton y di e zebrapad. Y tambe e ‘hot item’ aworaki ta e falta di conocemento di kico accidente ta costa of e por costa bo. Mayoria hende tin un aseguro cu por ta un suma di 150 mil florin, uno pa tur riesgo por ta 250 mil, cu ta mustra hopi placa. Pero si bo dal un palo di luz of un transformado, saca bo som! Sin conta e gastonan medico con caro nan ta y peor ta cu nan ta bin for di bo saco. Anto mi ta kere cu door di concientiza hende tocante esaki, nos kier wak un reduccion den e dalmentonan, y e suma ta bay cambia”, Thomas Ruiz a splica.

            El a subraya cu e charla aki ta hopi importante. E ta ripara cu VRA ta hayando gran acogida, aunke nan a wordo ataca pa diferente instancia. E tin como cuater peticion riba su agenda y e ta hopi contento di scucha esaki.

            “Nos ta haya feedback positivo tambe cu hendenan ta cuminza papia di trafico, hendenan ta comenta cu nan a scucha den e charlanan cosnan cu nan no tabata sa, kiermen por wak e interes grandi cu tin den pueblo”, Ruiz a señala.

El a reitera cu e charlanan aki ta necesario y siman pasa el a reuni cu varios compania di seguro, tocante e voorwaarden (condicionnan) cu hopi hende no ta lesa. Hopi hende ta firma y te ora cu tin dalmento nan ta lesa esaki. Pesey, VRA ta duna splicacion durante e charla.

            Ruiz ta haci un yamada na tur bario, instancia y persona cu ta interesa pa haya e charla aki, pa tuma contacto cu VRA, y nan lo traha un fecha pa esaki.