Hopi hende riba pia pa mira e Caminda di Cruz Bibo

ORANJESTAD (AAN): Riba Diabierna Santo, un multitud di hende a acudi na e plenchi dilanti Misa Inmaculata Concepcion na Santa Cruz. 

Pastoor Jairo a declara cu esaki ta e observacion anual cu Iglesia ta para keto, y reflexiona riba e sufrimento di nos Señor Hesus Cristo.  Algo cu a start di comienzo di Cuaresma y a finaliza den e dianan di Semana Santa.

   Y esaki a wordo haci riba Diabierna cu un Caminda di Cruz Bibo dilanti e Misa.  Esaki ta e dramatizacion di loke a tuma lugar.  Pastoor Jairo a splica cu tin biaha ta bon pa laga nos wowonan mira atrobe y laga e inteligencia di cada persona compronde cu tin un hende a sacrifica su bida pa nos, cu su sufrimento, y pesey tin di balora cada dia di nos bida.

   Pastoor Jairo a keda satisfecho pa mira con e Caminda di Cruz Bibo aki ta pone hopi hende sali di cas y acudi pa observa y sigui e pasonan di Cristo.

   E ta spera cu portanan cera na cas por habri, pa asina start eynan cu un mihor bida spiritual, specialmente cerca e generacion nobo!  E muchanan tin di wordo siña di e balor y compronde e esencia y importancia di e sacrificio cu Hesus a haci pa tur di nos.

   Un palabra di felicitacion na esnan cu a organiza e Caminda di Cruz Bibo, cu e bon direccion, actuacion, make-up, vestuario, y escenario.