ORANJESTAD (AAN): Aunke autoridad hudicial ta keto bay silencioso pa cu e caso cu a socede Diadomingo anochi poco prome cu 7’or na Paseo Herencia,
por a nota cu tin hopi detaye ta circulando riba Social Media, cu ta mustra cu e acto unda na final un hoben a cay for di Piso 3 di parking lot te na suela por ta un acto criminal.
Diferente hende ta mustrando cu mas insistencia, cu a mira un hende coriendo tras di DJ Louisville for di un otro mall, cruzando caya y a drenta den parkinglot di Paseo Herencia, y bay halto.
Un video ta circulando riba social media, di un chauffeur cu tabata sinta den su auto den e parkinglot, papiando Ingles y bisando cu dos persona a cuminza bringa den e parkinglot aki, y na final uno a pusha e otro benta over di muraya.
E persona papiando na Ingles, a bisa cu e dos hobennan aki a bin coriendo for di un Nightclub na otro banda di caminda. Con e por sa esey (persecusion di un Mall pa e otro) siendo e ta sintando den un auto, ta pone un tiki duda na e storia.
PUSHA E HOBEN: Pero toch e por ta un pida esencial den e investigacion. Pues cu posiblemente ta intencionalmente a pusha e hoben di 20 aña, cu a cay den e gang chikito mey-mey di Beach ‘N’ Flips Aruba y Tommy Hilfiger y keda mortalmente herida eybao, y a fayece casi 3 ora despues na Hospital.
Cu a haya parti di pertenencia di DJ Louisville benta abao y kibra na di dos piso, lo por ta indicacion cu a bringa cune na di 2ndo piso tambe, y despues a sigui su tras bay halto pa di tercer piso.
Tin di remarca cu e hoben Luis Angel Figueroa Flores (“DJ Louisville”) mes NO tin auto. Su mama tabata den un area di Lowrise Hotel wardando su yamada pa e bay busk’e pa hibe cas. Pues aki tin e pregunta di con el a bay den Parkinglot anto.
E persona riba e video, ta bisa cu na prome instante hendenan a kere cu ta el (chauffeur) ta esun cu a bringa cu e hoben y bente abao, pero e ta bisa cu esey no ta e caso.
Mientras tanto, Recherche ta keto bay investigando e caso aki, y si ta corecto nan lo a pasa na tur empresa cu tin den e area di e dos Mall aki pa asina recompila Security Video di tur cos cu a pasa den e area, y pa check si berdad tabatin un persona coriendo cu mal intencion na pia tras di e victima.
DIARIO a compronde cu keto bay e curpa ta den beslag pa practica autopsia.
DOCENTENAN TRISTO: Riba Dialuna mainta ora cu e noticia a yega na EPB Oranjestad di e fayecimento di Luis Angel Figueroa Flores di 20 aña di edad, mesora docentenan a corda e hoben semper alegre, divertido, cu tur ora bay tabata anima fiesta pa nan.
Luis Angel tabata hasta wordo yama e “DJ di EPB”, como cu semper e ta bin cu su mesun equipo pa anima cualkier fiesta, cena di Pasco, of otro actividad pa scol.
Mainta ey, casi e docentenan no tabatin animo mas pa duna les, como cu e noticia di morto di Luis Angel a dal nan duro, te cu lagrima a yena wowo di hopi docente.
“ENTREGA BO MES”: Mientras tanto, riba Social Media tin hopi hende cu ta haciendo peticion y rogando e persona cu supuestamente a pusha y benta e hoben for di muraya, pa e entrega su mes na autoridad.
Pasobra mas bo tarda pa entrega bo mes, ta mas malo bo ta wordo “mira” for di punto di bista hudicial. Of bo ta djis warda te ora cu Recherche y Team di Arresto presenta na bo cas pa detene bo.
Hendenan ta furioso cu un criminal kizas ta canando rond mey-mey di pueblo, siendo cu el a caba di comete un crimen hopi baho riba Diadomingo anochi, cu a laga famia y amigonan cu dolor inmenso na nan curazon.
Aunke DIARIO tin di adverti publico, cu keto bay tur hende tin di warda e resultado final di Recherche y tambe di Autopsia pa haya sa si el a haya golpi prome cu el a cay, y di kico exacto el a fayece.
Un biaha mas DIARIO ta extende su mas profundo palabra di condolencia na e famia.
