Hopi hende a acudi pa mira e exposicion ‘Arte den Bario’

ORANJESTAD (AAN): Hopi hende tabata presente anochi na Ateliers '89 pa e gran apertura di 2 exposicion hopi importante,

cu ta Arte Den Bario cu ta mustra e obranan haci ultimo ultimo 6 luna hunto cu Fundacion Centro di Bario Sabana Basora, y tambe di Centro di Bario Brazil cu e proyecto Gen297 di ATHA.

   Arte Den Bario ta un programa di Tra’i Merdia cu Ateliers '89 ta bin ta ehecutando ya pa mas di 10 aña caba. Esaki como su proyecto especial pa muchanan di menos recurso den e diferente bario nan local. Aña pasa y aña aki a duna diferente di e workshop nan aki completamente gratis na participante nan di, Fundacion Centro Familiar Sabana Basora cu colaboracion di señora Josefina Gross y e proyecto Gen297 di ATHA bao guia di señorita Franchesca Heinze na Centro di Bario Brazil.

   Awor a haya e oprtunidad unico pa mustra un muestra rasonable di e obra nan traha cu colaboracion di Fundacion Eterno bao guia di señora Osaira Muyale. Cu pintura, dibuho y 3D. Musica y Film bao guia di Adriano Nanof di Fundacion Cine Aruba.  Nan a yuda e muchanan di 8 te 16 aña cu un workshop, p adespues via arte nan ta expresa nan mes loke nan ta sinti di ta pasando aworaki den nan bario.

   Durante e workshop nan aki a traha cu mucha nan di edad nan rond di 8 pa 16 aña. E no solamente tabata pa trece e hoben nan aki den contacto cu arte si no tambe pa siña nan expresa nan mes den tur otro forma y disciplina.

   Elvis Lopez di Ateliers ’89 tabata hopi contento cu e forma cu publico a reacciona e anochi aki na e Exposicion aki.  Tabatin musica y hopi arte pa mira.

E anochi a bira uno sin igual caminda arte tabata central.