Terapista Enid de Kort:
ORANJESTAD (AAN): Enid de Kort, Terapista di Pareha na Departamento di Asuntonan Social a bati alarma riba e casonan di violencia entre pareha cu tin na Aruba.
El a splica cu e famianan ta den crisis. Awendia tin hopi divorcio, separacion. Pero tambe tin casonan caminda e muchanan ta ser a conoci cu varios partner di nan mayornan. Pesey ta importante pa ta sigur cu e relacion ta uno serio pa asina poco poco introduci e yiu cu e pareha nobo.
Buscamento di ayudo den casonan di agresion of violencia ta necesario.
De Kort a indica cu unabes cu un pareha a cuminsa agredi otro y bay haci uzo di arma, unabes cu bo no por controla bo mes mas bo emocionnan, bo dolornan, mester sa cu tin ayudo.
El a enfatisa cu e sa cu no tin suficiente persona pa duna ayudo na parehanan. Pero pesey tambe Sociale Zaken a cuminsa cu congresonan pa parehanan. A dicidi di uni forsa cu otro instancianan y esey ta un comienso, a bisa. Kier bay mas cerca door di bay den barionan.
E terapista a agrega cu e persona of e pareha mester por sa den ki fase nan ta den nan bida. Tin ora nan ta hayando e señal, pero mester tum'e na serio. Violencia ya caba ta un señal serio cu mester ayudo.
Tin momentonan unda nos no por maneha nos mes y mester di un hende neutral pa yuda nos, a expresa.
