Dalgis Montalvo di Stuur Groep GGZ Stichting HUNTO
ORANJESTAD (AAN) – Dalgis Montalvo, director di Stichting HUNTO, den entrevista cu DIARIO a papia tocante e sintomanan di rebeldia cu tin bao diferente hoben den nos comunidad, cu ta actua cu violencia, cu tin falta di guia y tin caso cu mester busca ayudo psicologico.
Montalvo a señala diferente aspecto cu ta hunga un rol, manera entre otro, e plataformanan social; canticanan, video clips, trendnan riba social media. Esaki ta uno, y na di dos lugar famianan unda mayornan tin cu traha dos of tres trabao, cu orarionan laboral hopi largo. Tambe tin muchanan cu ta keda hopi ora nan so na cas, sin cu tin un guia, y e ora ey nan ta bay cerca nan amigonan, busca retonan, busca otro cos pa haci.
Montalvo ta indica cu e problematica ta hopi compleho, no ta algo cu bo por mustra riba un aspecto dje, pasobra tin hopi factor y e ta refleha den e casonan cu ta drenta cerca e stichting pa ayudo psicologico tambe.
Dalgis Montalvo a splica cu, en principio, ya caba stuur groep GGZ tin un inventarizacion di kico tur ta e diferente puntonan cu mester traha riba dje, pa loke ta GGZ y aworaki nan ta bezig tambe ta wak cu mester trek e parti di onderwijs; con por yuda e educadornan cu nan tambe por sa kico ta e problematica cu esnan di GGZ ta bezig ta wak, con nan por instrui nan tambe riba e parti aki. Pesey HUNTO a sinta cu SKOA, y otro aña nan lo ta sintando cu scolnan basico. Nan ta bayendo sector priva y diferente scol cu tambe ta mira e problema di tanto drogadiccion como alcohol.
Montalvo a bisa cu HUNTO so no por cargu'e, y pesey ta importante pa otro veldnan tambe ta envolvi, y den e parti di onderwijs tambe nan tin cu sinta pa duna e muchanan e herment, siña y mustra nan kico ta e problematica y kico su consecuencianan.
