Sea cauteloso cu uzo:
ORANJESTAD (AAN) — Hopi bela di Citronella, insecticida pa mata sangura, spiral pa core cu nan, repellent den spray of den forma di roll on, pa hunta na curpa, consumidornan ta cumprando e dianan aki, pasobra tur caminda tin sangura na cantidad, y incluso cu airco cendi den camber nan ta causa molester, specialmente den barionan hopi habita.
Tur hende tin miedo di dengue, cu manera ta conoci, ta ocasiona door di pica di sangura “Aedes aegypti” y cual consecuencia di un pica por ta leve, pero tambe por ta causa complicacion, uno ta e syndrome di Guillain Barre, cu den pasado a afecta como cuatro persona aki na Aruba, despues cu nan a haya dengue.
En todo caso, ta hopi bon pa tene cuenta cu e medidanan preventivo contra dengue y pa corda cu no tur sangura ta transmitie. E medida preventivo principal ta evita criadero. No laga awa para den hemchi, boter, tire, pot, bari di sushi, of cualkier otro obheto cu por contene awa.
Tambe mester pensa cu spuit insecticida por provoca alergia, ademas e bela di Citronella no mester keda cendi den camber cera pa henter anochi, pasobra e huma por afecta e hende su rosea. Tin hende cu no tin otro opcion pasobra ta alergico na repellent pa hunta of spuit na curpa.
E miho opcion y kizas e unico pa evita pica di e sangura cu ta transmiti dengue ta no dun'e oportunidad di broei. Na prome lugar e ta responsabilidad di comunidad henter, di cada famia, habitantenan den bario, pa tene e areanan rond di nan cas, trabao, scolnan, etc., liber di acumulacion di awa.
