Directora di DIMP a anuncia:
ORANJESTAD (AAN): Luenne Gomez-Pieters, Directora di Departamento di Impuesto a duna di conoce cu pa algun aña cab, tur formulario cu e contribuyentenan mester entrega a cuminsa traha den forma di fase.
A cuminsa cu tur e formilarionan cu tin cu wordo entrega mensualmente. Mas o menos 9 aña pasa e contribuyentenan mester a para den rij pa entrega nan formulario di Loonbelasting, BBO, etc y para den otro rij pa haci e pago di impuesto. Esaki a pasa pa pasado, a directora di DIMP a remarca.
Actualmente ta mira cu tin un trankilidad na DIMP, pero tambe cu e sistema di nan portal digital caminda cu e contribuyentenan y comerciantenan ta haci uzo di esaki pa entrega nan formularionan y haci nan pago.
Awo ta toca turno na e formulario di 'winstbelasting'. Segun Gomez-Pieters. esaki ta un proyecto di un embergadura basta grandi. Tin un ekipo di profesionalnan di DIMP cu ta trahando duro fo'i aña pasa despues cu a caba e introduccion di BBO na frontera, a bisa.
Ta asina leu cu pa dia 16 di Mei, e formulario di 'winstbelasting' lo ta disponibel den e portal BO impuesto (BOi). Si e contribuyentenan ta haci uzo di un asesor fiscal, tin algun tips pa e contribuyentenan por ta den contacto cu nan asesor fiscal pa e proceso aki por cana hopi lihe, Luenne Gomez-Pieters a expresa.
No mester lubida cu pa aña ta otorga, riba tereno di 'winstbelasting' rond di 10 mil formulario di papel na e contribuyentenan. Contribuyentenan di 'Inkomstenbelasting' ta ricibi 40 mil formulario. Pesey pa DIMP ta hopi importante pa ta hopi mas agil riba e tereno aki.
El a splica cu e papel por perde, no ta wordo entrega, ta lubida riba e envelop, kier scond'e. Kier kita tur e miedonan aki, pasobra DIMP tey pa facilita cu e contribuyente por cumpli cu su obligacionnan.
E fecha pa entrega e formulario 2023 (provisional of definitivo ) di 'winstbelasting' ta 1 di juli 2024. Den caso c'un contribuyente kier haya un extension e lo mester entrega un 'verloop aangifte' y haci e pago corespondiente. E fecha final despues di duna prolongacion ta bira 2 di december 2024.
