E ta na bienestar di e isla mes
ORANJESTAD (AAN): Recien a tuma nota cu Ministro Arthur Dowers a bin dilanti y duna e bon noticia, cu el a analiza y na final a duna luz berde pa e proyecto di AWSS sigui su proceso normal bay dilanti.
AWSS estableci pa organisa, di manera integral, e maneho y e sostenebilidad di e infrastructura di awa residual di Aruba. For di juli 2024, e red di awa residual, tres planta di purificacion di awa (Bubali, Parkietenbos y Zeewijk), y e instalacion di incinerator a wordo transferi na AWSS.
Segun Ministro, e enfoke a corto plaso ta dirigi riba stabilisacion di e instalacionnan y eliminacion di mantencion atrasa. Prioridad ta wordo duna na mehoramento di prestacion operacional, capacidad y claridad di purificacion.
Pa Bubali, ta apunta riba aumenta e eficiencia di purificacion for di mas o menos 35% pa 65%, cu mehoramento gradualmente te ora yega 90%. E plantanan di Parkietenbos y Zeewijk ta wordo optimalisa pa garantisa prestacion sosteni riba largo plaso. Adicionalmente, AWSS ta atende punto critico den proceso di tratamento di material residual den e instalacion di incinerator.
AWSS ta fortalece monitoreo di calidad di awa, servicio di laboratorio y medimento ambiental, den colaboracion cu partnernan externo.
Na nivel organisatorio, ta traha riba mehoracion di maneho di infrastructura y ekipo, mantencion, siguridad, continuidad operacional y desaroyo di personal. A largo plaso, AWSS ta desaroyando un plan integral di maneho di recurso, cu analisisnan di scenario, prioridad di inversion y oportunidadnan pa re-uso di awa y pa crea fluho nobo di entrada financiero.
