Hopi Arubiano na Orlando lo ta pasando mañan den poderoso Horcan Milton

Vakantie ta on-hold pa e turistanan aki

• Tur cos ta cera Diaranson y Diahuebs na Florida 

ORANJESTAD (AAN): Den menos di 24 ora, Tormenta Tropical Milton a escala pa un Horcan di Categoria 1, y ya Dialuna mainta 11:00 am el a converti su mes den un poderoso y destructivo Horcan Milton di Categoria 5.

   Su crecemento rapido ta bin debi na e hecho cu awa di lama den Golfo di Mexico ta hopi cayente e simannan aki.  Esaki mesora a alerta autoridadnan na estado di Florida aun mas.  Menos cu dos siman despues cu Horcan Helen a azota costa west di Florida y ainda tera ta hopi satura cu areanan yena cu awa... ata un otro horcan poderoso ta yegando ya Diaranson bek na costa.

   Y e biaha aki e lo bay yega como un Horcan di Categoria 4 of 5, y lo subi tera y cruza area cerca di Orlando (Florida) como un Horcan di Categoria 3.  Y hecho ta cu tin hopi Arubiano aworaki di vakantie na Orlando e momentonan aki, y nan lo tin di bay keda paden di nan Hotel pa pasa den e Horcan potente aki.  Algun Hotel cu no por ofrece seguridad, a hasta manda huespednan bay keda den Shelternan publico.

   Dialuna mainta 11:00 am, Horcan Milton a intensifica explosivamente y yega Categoria 5, cu ta esun mas fuerte di clasificacion.  E tin biento maximo sosteni di 280 km/h.  E hecho cu el a reforza asina rapido, ta wordo mira como un comportacion ‘extremo’ di e ciclon aki.  Den pasado a yega di mira un Horcan haya forza asina rapido solamente dos biaha.  Algo similar a pasa cu Horcan Wilma na 2005, y tambe Horcan Felix na 2007.  Meteorologonan no tin palabra pa describi e intensificacion extraordinario aki.

   Dialuna e ta cerca di peninsula di Yucatan na Mexico, cu ta bao Hurricane Warning.  Na Florida ya caba tur sorto di advertencia ta valido caba.  Pronostico ta cu e horcan lo debilita un poco prome cu e subi tera riba Diasabra.

   Florida ya ta evacuando: Mayoria di hendenan cu ta biba na costa west di Florida, a cuminza evacua, y e calculo ta cu como 6.8 miyon hende di Florida ta evacuando.  Pesey Dialuna varios ta tur highway tabata congestiona cu trafico.  Gobierno a hasta duna permiso pa hendenan cuminsa usa e acera di Freeway tambe pa core riba dje.  Tur hende alehando pasobra Milton lo bay ta un horcan hopi grandi y poderoso cu ta azota e estado.

   Horcan Milton lo bay ta cruzando area di Orlando cu hopi biento y yobida.  Ya desde Diadomingo mainta caba tabatin rij largo di hende den Supermarketnan ta cumprando cuminda den bleki, y boternan di awa.  Esaki a bira scars den un rato di ora.  Tambe hendenan cumprando flashlight y bateria.  Rij na stacionnan di gasolin tabata inmenso.

   Gobierno di Florida ta mandando hopi truck yena cu cuminda y awa pa Centro di Florida.  NASA y SpaceX a cancela e lanzamento di un mision di raket yama Europa Clipper cu tabata programa pa Diahuebs.

   Mensahe di Consul General: Riba Dialuna, Consul-General di Reino Hulandes na Miami, a emiti un boletin pa tur esnan di nacionalidad Hulandes aworaki na Florida.

   Nan ta pidi tur hende pa sigui tur advertencia valido pa cu Horcan Milton cu lo yega tera riba Diaranson cu impactonan severo riba e estado.  Nan ta conseha tur hende sigui detaye di anuncionan oficial.

   Si acaso cualkier Hulandes mester di asistencia, por contact e website di Nederlandwereldwijd.nl y tambe yama +31 247 247 247.

   Arubianonan na Orlando: Ainda Dialuna tabatin avion a sali cu yen Arubiano rumbo pa Orlando.  Nan ta hunto cu esnan cu ya caba a viaha Diabierna, Diasabra, y Diadomingo.  Aworaki ta October Vakantie, pues ta hopi hende ta aya.

   Algun conseho ta pa nan tambe check si por haya suficiente boter di awa, cumpra flashlight, powerbanks pa charge bo smartphone.  Si bo a huur auto, busca forma pa staciona esaki na un lugar di bo Hotel cu no ta cerca di e.o. baki di sushi, of palonan di palma cu por kibra y cay riba e auto, treciendo gasto adicional.  Corda cu kizas bo ta keda henter dia paden sin por sali, y check pa bo tin cuminda cu bo por come sin cu tin di keinta nan.

   Ceramento Disney World: Te cu Dialuna atardi ainda Walt Disney World Resort no a anuncia si acaso nan lo ta cera awe Diamars.  Universal Orlando tampoco no a duna informacion.  Ambos tabata habri riba Dialuna.

  SeaWorld Orlando, y Busch Gardens (Tampa) te Dialuna atardi tampoco no kier anuncia si acaso nan lo ta habri awe (Diamars) of no.

   Legoland Florida na Winter Haven a anuncia cu nan lo ta cera Diaranson y Diahuebs.

   Hecho ta cu tur e Parkenan di Atraccion na Orlando e dianan aki tin e tema di Halloween cual ta sigui te anochi laat.  Pero hasta si e parkenan keda habri awe Diamars mes, pa e huespednan yega eynan lo bay ta hopi dificil.

   Scolnan cerando awe: Universidad di Central Florida (UCF) na Orlando tin hopi studiante di Aruba, y nan lo suspende operacion y tur les, incluyendo lesnan online, awe Diamars mainta.  Nan lo ta cera Diaranson y tambe Diahuebs.

  Valencia College na Orlando tambe tin studiante di Aruba, y nan lo ta cera awe Diamars, Diaranson, y Diahuebs.  Si acaso no tin daño extenso, nan lo habri bek Diabierna 11 di October.

   Florida Tech na Melbourne tambe tin studiantenan di Aruba, y nan lo ta cerando Diamars pa 12’or di merdia.  Plan ta pa habri bek te Diabierna.

   Stetson University na Deland ta bay ta cera Diamars y Diaranson.  Campus y Residence Halls lo cera Diamars pa 1:00 pm.

   Aeropuerto di Tampa ta cera awe: Tampa International Airport lo bay ta cerando pa awe Diamars pa 9:00 am.  Nan lo habri bek te ora cu ta safe pa permiti avionnan baha of ateriza, pues no tin un fecha poni pa habri bek, ni por pronostica kico un horcan di e magnitud aki lo haci cu nan.  Aeropuerto di Tampa ta situa den un zona unda obligatoriamente tur hende mester evacua prome cu e horcan yega.

   Pronostico ta cu olanan di 12 pia halto lo bay ta azotando Tampa ya desde Diamars anochi caba.

   Aeropuerto di Orlando ta cera mañan: A keda confirma cu Orlando International Airport (MCO) y tambe Orlando Executive Airport (ORL) lo stop cu tur vuelo comercial y priva riba Diaranson mainta.  Nan lo keda habri pa acepta cualkier vuelo cu tin di haci aterizahe di emergencia, of vuelo di yudansa.  Despues cu horcan pasa, nan ta bay revisa tur pista, tur luz, y tur sistema di instrumento, prome cu nan dicidi ki ora (of ki dia) lo habri bek.

    Barconan crusero: E barco Grandeur of the Seas cu a sali ayera di Tampa, lo no bay Mexico mas, sino a tuma rumbo pa Bahamas.  E barco Utopia of the Seas cu a sali ayera di Port Canaveral, lo cambia di destinacion.  Harmony of the Seas cu a sali di Galveston, lo no bishita Roatan (Honduras), sino bishita Costa Maya (Mexico).  Wonder of the Seas cu a sali di Port Canaveral riba Diadomingo, lo bishita Jamaica envez di Mexico.  Independence of the Seas cu a sali Diasabra di Miami lo bishita Puerto Plata envez di Cozumel.