Hopi ambiente den fiesta pa celebra di 55 aniversario Centro di Bario Noord

ORANJESTAD (AAN): Fundacion Centro di Bario Noord kier expresa su mas profundo gradicimento na tur persona,

empresa, organizacion y boluntario cu a contribui pa haci e clausura di nos celebracion di 55 aniversario un gran exito.

   E "Fiesta Comunitario Bailabel" di clausura a logra reuni no solamente e comunidad di Noord, pero henter Aruba cu a yega Centro pa celebra hunto den un ambiente di alegria, union y cultura. Tabata un anochi special yena di musica, baile y convivencia cu lo keda den nos curason.

   Durante henter e aña di celebracion, Centro di Bario Noord a organiza diferente actividadnan exitoso incluyendo e Sesosport y Speurtocht cu a tuma lugar aña pasa, creando momento unico pa hoben, adulto y famia den comunidad. Nos kier duna un danki special na Sharine y su Taxi Dancers pa nan energia y animacion espectacular durante e anochi. Tambe nos ta hopi gradici na tur medio di comunicacion cu a brinda apoyo promocional, specialmente Juancito, Mimi, Enfoke y Arthur. Un gradicimento grandi ta bay tambe na tur boluntario cu a dedica nan tempo, esfuerso y amor riba e diasabra ey. Sin boso apoyo y compromiso, e evento lo no tabata posible.

   Centro di Bario Noord ta realmente gradici pa tur yudansa ricibi. Noan kier reconoce y gradici tur nos sponsor cu a contribui generosamente pa haci e gran celebracion comunitario aki un realidad: Pa cover bandanan y sound: Setar, Web, ATA, APA, Empresa Italo Arubano Pa cover Soppi Carni, Balashi, Prosecco y Moscato free pa feestgangers: Hilton Hotel, Balashi (Tropical Bottling Co), Swift Distribution Pa cover gift certificates pa rifa na feestgangers: La Nuena, Gianni’s, The Old Cunuco House, Caribbean Palm Village Demas donations: Casa Haime, ASD, Conar, Lings Restaurant, Hunt Dental, Dairon Kelly, Carlos Bermudez, Sammy Giel.  Nan apoyo a demostra cu ora comunidad y empresa uni forsa, cosnan bunita por wordo logra na fabor di henter Aruba.

   Centro di Bario Noord ta mira atras cu hopi orguyo riba e 55 aña di existencia y servicio na comunidad. Nos ta spera di sigui construi recuerdo, actividadnan y oportunidadnan pa nos pueblo den futuro.